سيراميك .. فخار .. وأشياء جميلة أخرى!

السلاااااااااااام عليكم
اشونكم؟ أخباركم؟
هالمرة حاولت ما أتأخر قدر الإمكان..
ونعم.. كما هو واضح من العنوان.. راح أكشف لكم جانب فني مهم في شخصيتي..
تذكرون من جنا صغار نحب نلعب بالطين؟
ما أدري عاد إنتو جنتوا مثلي لو لا!
بس آني ترباية شقق، ومن نروح بيت أحد عنده حديقة يعجبنة من ضمن اللوصة أنه نلعب بالطين ونشكل أشكال.. (حتة كبة مسوية من الطين، بس ما أكلتهة لتخافون)..
وهنا هم بالصيف جنة نروح للبحر ومثل الكارتون نبني قلاع ونزينها بالصدف..
هسة آني كبيرة ما أكدر أبني قلاع على البحر، ولا أكدر ألعب بالطين، لازم أكعد بوقار وأناقة يم الناس!
بالتالي وعن طريق صديقتي العزيزة أتاوي، اكتشفت الجانب الفني اللي جان مندثر تحت تلال من التمدن والحضارة..
ورحت وياها لكهفها (أقصد مشغلها) الخاص، ولعبت بالطين!
نعم..
لكن هالمرة بقواعد.. وخلوني اهمسلكم..
ترة والله الشغلة حلوة، تريح النفس، وترجع ذكريات الطفولة، وتنفس الكبت الناتج عن العمل وضغط الحياة، والنتائج حلوة والواحد يفتخر بيها..
فالمهم وبما أنه أتاوي راح تتزوج قبلي بشهر لو وياية لو وراية (تالي ازوجت وراية بشهر) بس المهم وراح تروح بلد ثاني، وتعزل الكهف مالتها، فقلت أستغل الفرصة وأتعلم على إيد هاية الفنانة اللي هم ضامة فنها يمكن من الحسد..
إي.. ولبسنا جلد النمر ومسكنا عظام الدجاج (عود نازوكيين) وذهبنا للكهف..
ههههههههههه
لا عيني مو لهالدرجة، بس أخذني واهس الفخار والأواني الحجرية، وعزلة مشغل أتاوي الخاص وهدوءه منقطع النظير..
زييييييييييين..
وبما أنه صرت بروفيشينال.. خلي أشرحلكم شلون تسوون عمل.. (مو سحر) .. عمل فني جميل..
أولاً..... الفكرة..
أريد فدشي جميل، مميز، غير موجود في المحلات، ومو صعب التشكيل..
فدشي مثل خارطة العراق، تذكرت اللوحة اللي أحبها جداً في بيت احد أقاربنا، خارطة العراق مرسومة على الزجاج، كلش حلوة، وعندي أصلاً الخارطة بحجم كبير ممكن أخرمها على الورقة واستخدم الورقة لطباعة الرسمة على الطين وكصها (يعني مو بإيدي أرسم، بالعربي غش) بس غش إبداعي..
ممكن الملوية، أيضاً سهلة نوعاً ما، وممكن أدور صورة على الإنترنت واطبعها على ورقة A3 وأخرمها أيضاً..
أول شي العجينة، طلعنة من الكنتور طين متحجر جان ملك لأستاذها قديماً، خليط طين هوه محضره يعني تركيبة من المواد اللي تخلي السيراميك زجاجي أكثر أو بلاستيكي أكثر أو يعني اشتروا طين جاهز وفضوهة لأن هاية مو شغلة الفنانة الرقيقة..
كسرنة الطين، ونكعنا بمي، يومين يمكن لحد ما صار طين حلو، طلعنة جزء حتة نشتغل عليه، المفروض أن يتم عجنه على طاولة خشبية لأن الخشب يمتص الرطوبة منه إلى حد ما، ويتم عجنه بطريقة معينة حتى نطلع منه الهواء، لأن أي فقاعة هوة تخرب العمل عند الفخر، وينكسر..
بعد ما عجنا العجينة، وما أنه نريد نسوي جدارية، المفروض نفرش العجينة، إما بجاز فرش معين نكدر نحدد بيه سمك العجينة، أو بالشوبك عادي جداً، بس يرادله إيد خفيفة ودقيقة..
وصار عدنة عجينة مفروشة جاهزة للعمل كما في الصورة:


نطبع الحدود الخارجية للملوية، وخطوطها الرئيسية، ونوخر الورقة، ونبدأ نحفر ونعمق، ومثل ما علمتني أبلة أتاوي أو ست أتاوي، عمقنا الدرجات بحيث طلعت درجات حقيقية وانطت بُعد للملوية..


نغطي العمل بقماش حتى لا ينشف بسرعة فيتقعر أو ينحني، وثاني يوم هم نعدل شوية على الشكل لأن الطين يكون صار شوية أقوة، وهكذا نتابعها فترة إلى أن تنشف تماماً بس ببطء، يعني فد أسبوع، وبعد ما نجمع أعمال بحيث تملأ الفرن الواضح في الصورة:

تقرر ست اتاوي أنه نفتح الفرن، ونصف الرفوف داخل الفرن، ونصف عليها الأعمال، ونشغل الفرن اللي يبقة شغال تقريباً يوم ونصف، يصل لدرجة حرارة عالية جداً، ثم يفصل لوحده، وبعد يوم تهدأ حرارته حتى نكدر نفتحه واحتمال ننتظر يومين حسب الجو، المهم يبرد..
نطلع الأعمال وتكون بالشكل التالي:


هذه قطع سيراميك مفلشة لأن العجينة كانت تحتوي على فقاعات كما هو مبين في الصورة، وهذا اللي حجيت عنه قبل شوية، أنه طريقة العجن مهمة حتى لا تبقة الفقاقيع في العجينة:



لتلوين العمل، ممكن تلوينه بالألوان الخاصة بالسيراميك واللي تصير كأنها طبقة زجاجية فوق الفخار، وهي عبارة عن أكاسيد ومواد كيمياوية، بودرة لونها أبيض أو شوية على وردي أو شوية على أزرق، ويتم خلط البودرة بالماء والتلوين، وصدكوني تلوين عميان، أبيض بابيض، بس على علبة الأوكسيد مكتوب شنوة اللون، مع الأسف ما عندي صورة إلهة.
وبعد ما ينشف اللون، نفخر الأعمال مرة ثانية حتة يطلع اللون الحقيقي للقطعة وتتحول الأكاسيد إلى زجاج ملون.
هذه لوحة اسم توضع على المكتب، الصورة الأولى طين، الثانية طين مفخور ويسمى "بسكوت"، والثالثة هي للعمل بعد ما أكتمل تماماً:




               


اللون الذهبي في هذا العمل هوه مو لون، إنما ورق رقيق جداً، فبعد أن تم فخر القطعة بعد التلوين وطلعت كلها زرقة، حطنا صمغ معين يجي مع الورق الذهبي، ولزكنا الورق الرقيق فانطة اللون الذهبي الجميل.
وهنا تجي التحفة الفنية، خارطة العراق حوالي نصف متر في نصف متر، لكن التلوين هنا سوينا بالآكرلك، لأن هيه أصلاً لوحة مو صحن لو فدشي راح يستخدم، إنما فقط تعلق على الحائط، وخفت أنه درجات الألوان متطلع مضبوطة بعد الفخر، يجوز أغمق من اللي نريده، ويخرب اللوك مالت العلم، فلوناها آكرلك ورشيناها سبري شعر حتة ينطها اللمعة.



نخلتين والملوية معلقة في بيتي:




لوحات صغيرة من عمل خواتي:



خارطة العراق تجريبية بحجم كف اليد:


وهاهية خلص درس السيراميك، إن شاء الله يكون عجبكم..
وللساكنين في دولة الإمارات، أكو معهد للفن التشكيلي في المنطقة التراثية بالشارقة، ويوفرون مواصلات، والأستاذ عراقي، والعتب عاللي ميروح!

متى يكونون قدوة ؟



نعم نعم .. ها أنا ذا قد أتيت ..
أقوى من الشدة ..
أطول من المدة ..
أهدأ من السكون ..
أسرع من لمح العـ.....
أهو .. أكيد ضجتوا مني كل مرة اكولها مو؟
عموماً هوه آني اليوم صرت خوش بنية ونظفت البيت وسويت تبسي بيتنجان (أو مسقعة على قولة أخونا المصريين) وفدشي آخر من اختراعاتي، طبعاً غدة باجر..
هكذا يكون الحال من المرأة تشتغل..
وهسه كعدت على اللابتوب!
كعدت بالمطبخ حتى لا أروح على الغرفة وأفتح التلفزيون وأكسل أكتب!
شفتوا شلون سبعة آني؟
قررت أنه أفتح إيميلي اللي خطية كام يكبي من كثر ما معبأ..
بس كلت.. لا وألف لا.. أدري راح أنشغل بالإيميل وأتعب وأسد اللابتوب وأكوم ..
خلي أبدي بموضوع المدونة..
لأن راسي هم كام يكبي لأن مليان شغلات أريد أكتبها، بحيث صدك بعضها تكبة ونسيته!
لحظة بالله دا آكل لكمة .. الحمد لله ..
تعرفون كلت خلي آكل وأكتب أحسن ..
هوه صحيح الساعة 8:45 مساء لكني دا أتغدة..
يعني هوه آني شوكت رجعت من الدوام؟؟
-----------------
عموماً... خلونة من سوالفي.. خلي نجي على الموضوع المهم
متى يكونون قدوة؟
أول شي .. منو همه؟
طبعاً اللي احنة أو أغلب العرب يقلدوهم بكلشي..

لحظة.. خلي نبدي من البداية..
بينما أقلب بين القنوات قريت خبر عن أنه الملكة إليزابث جاية تفتتح متحف زايد -رحمه الله- ..
ما أعرف شنو متحف زايد، شنو المعروضات، لكني أفترض أنه تكريم من الشعب لحاكمه الرشيد، فالمفروض تكون المسألة وطنية بوطنية..
لكن هم مو مشكلة يجي ضيف على الحفلة، ما راح نكول لا..
لكن اللي لفت إنتباهي أنه الملكة إليزابث جانت لابسة ملابس كأنها ببريطانيا.. أول شي فكرت أنها راح تموت من الحر لأنها جانت تمشي جوة الشمس، بعدين تذكرت أنه الجو هسه ربيعي، بس بعدين خطر على بالي شيء معين..
لمة العرب يروحون لبلاد الأجانب، بريطانيا كمثال، يلبسون قاط، شورت، والذي منه .. يعني اللبس الأجنبي، مو لبسهم العربي اللي يميزهم..
بينما لمة جتي الملكة وحاشيتها، ورغم انه ملابسهم تعتبر أولد فاشن، وتشبه مالت الأفلام القديمة، وبعد محد يلبسها بالشارع، لكنها لبستها بكل فخر.. وبكل أناقة.. تمشت بقبعة بيها كوميل وورد، وبقفازات، وكلادة لولو!
ليش إحنة منسوي المثل؟


ليش ما نلبس لبسنا العربي ونتمخطر بيه بشوارعهم، بل وفي احتفالاتهم الرسمية..
طبعاً مع أهمية الأخلاق العليا، لأن الواحد ميصير يصخم وهو لابس هاي الهدوم المقدسة، وبالتالي يلصق الصخام بالهدوم مو بالشخص!
يعني إحنة بكلشي قلدنا الغرب، كالوا التعليم باختيار الطالب، وبجهد الطالب (وإحنة نعرف الطالب ميدرس إلا بالجلاليق) كلنا نغير التعليم!
كالوا فاست فود كلنا فاست فود ..
كالوا نلبس ضيق لبسنا ضيق..
كالوا نعال الحمام مودة.. كلنا مودة..
كالوا الشورت بالشارع رقي.. لبسنا شورت بالشارع (وهم معقج فوكاها)..
كالوا بنطرون يعني فد طخة ويوكع .. لبسنا منطرون راح يوكع..
كالوا الأندروير كشخة يطلع.. طلعنا الأندروير..
كالوا المرية لازم تتحرر وتصبغ وجهها بفد كيلويين ثلاثة ألوان .. تحررنا وصبغنا..
كالوا الرجال ينقش لحيته نقش، والمكياج الخفيف عليه حلو.. نقشنا وصبغنا.. (صدك والله أساس وكحلة وحمرة!)..
يعني هيه جتي على الأشياء البيها خير مقلدناها؟
احترام المواعيد مثلاً ..
والفخر بالثقافة واللبس..
صدك والله.. شكو بيها؟
من جنة صغار علمتنا ماما الله يبارك بيها أنه الصحابيات همه قدوتنا، لكنها كانت تنصحنة نصير رقيقات مثل سندريلا، ونشتغل بالبيت مثل سالي ويعني ممكن نقلد لكن الأشياء الحلوة واللي تخلينا ناس صالحين والناس يحبونا..
لكن انتفت قيمة ومعنى كلمة (القدوة) .. يمكن ما انتفت لكنها على الأقل تغيرت وقلت قداستها..
صار الطفل والشاب والمراهق يقلد كل من هب ودب..
بل وتسألهم أو تذكر كدامهم أسماء المفروض إنها تكون قدوتهم، لكنهم مع كل أسف ما سمعوا بيها، قابل يعني راح نكول عمرو دياب لو توم كروز؟
زين ليش؟ شنو صار؟
الغلط من المجتمع؟ من البيت؟ من القدوة القريبة من الطفل يعني والديه وأهله؟
آني ما أدري.. إنتو تدرون؟؟؟؟؟؟؟؟؟؟
بالله لحظة يمكن التبسي لازم يطلع من الفرن ..
أوكي .. ياسلااااااااااااام .. الريحة تجنن والشكل يخبل .. ما بية حيل أجيب كامرة دا أشوفكم ..
زين عيني آني تعبت هسه وخلصت بطاريتي..
بس جان ابالي هذا الموضوع.. وفرحانة إني كتبت تدوينة.. وإن شاء الله ألكي وقت في أيامي القادمة للمزيد .. إن شاء الله ..
وووووو.. فتكم بعافية ..


ملاحظة: وآني دا أدور على صور للتدوينة، لكيت صورة الملكة إليزابيث وهي تزور مسجد الشيخ زايد رحمه الله، والحقيقة موقفها عجبني جداً لأن فيه احترام للآخر (اللي هوه احنة) واحترام للديانات الأخرى وهنا هي الإسلام ..
الملكة ما تخلت عن أناقتها ولا عن ديزاينها البريطاني لكنها احتشمت واحترمت المكان، نلاحظ أنها تلبس ثوب طويل عريض، مغلق للأسفل، حتى الدكم واصلة للأخير مع الربطة .. وحتة نازعة حذاءها لأنها تمشي داخل المسجد (وهاية كبيرة بالنسبة إلهم لأن من أصول الاتيكيت إنها تبقى لابسة الحذاء وين ما تروح .. لكن الاحترام وما أدراك ما الاحترام ..
شيء جميل جداً ..
لازم هم ناخذ منهم احترامهم للآخر وللديانات الأخرى، إي بس مو معناته نسلمهم كلشييييييييييي .. افتهمتوا مو؟


كل عام وأنتم بخير .... مع ملخص ما سبق!


السلااااااااااااااااااام عليكووووووووووم ورحمة الله وبركاته

ها أنا ذا قد أتيت..

أقوى من الشدة..

أطول من المدة..

أهدأ من السكون..

أسرع من لمح العين..

عرفتوني ؟؟

أكيد آني مو أبو الحروف ..

شلونكم؟ أخباركم؟

وين ما وين؟

على كولة أتاوي خلي أتغدة بيكم قبل ما تتعشون بية..

هسه تكولون ها وين راحت؟ وين غطت؟

أدري مو كل الناس تتزوج أشو هاية اختفت!

حقيقة أفتقد المدونة جداً..

وعندي كثير مواضيع أريد أحجي وياكم عنها..

وخوب رمضان .. وما أدراك ما رمضان..

ما أدري إذا جنتوا وياية رمضان الفات.. بس بوكتها حسيت نفسي أنجزت..

جنت يومية أدخل المدونة وأكتب أشياء، وبوكتها سويت فقرة حدث في مثل هذا اليوم (أيام رمضان)..

هالرمضان سبحان الله مختلف..

أرجع من الدوام 5:30 يادوب على المطبخ ويأذن ونطلع على التراويح إذا بية حيل أو أصليها بالبيت وكذلك القيام، ونرجع ننام شوية حتة نلحك اناملنة شوية فد ساعتين قبل السحور..

نتسحر وهم ننام حتة نكوم للدوام..

الحمد لله والشكر ..

اليوم أوف .. يعني إجازة عندي ...

وغسلت الهدوم وكنست ونظفت وطبخت.. (وهم سويت زردة اليوم كحلو بعد الإفطار وهي حلوى مصلاوية - يعني من يم أهلي زوجي - علمتني عليها خالة)

المهم خليكم من الزردة ..

خلي دا أحجيلكم مخلص ما فاتكم..

الحمد لله تزوجنا يوم 20/6/2010 ..


وبهالمناسبة أريد أشكر كل شخص كتبلي مباركة على المدونة، الأمورة فيولا وشموسة الحلوة والأعزاء جميعاً ..

خلي دا أحجيلكم على العرس..

بالنسبة لي حسيت الحفلة خلصت بسرعة، ملحكت أسوي شي، بس أسلم وأبوس بالنسوان، وجوه أعرفها ووجوه ما أعرفها..

لكن أسعدني كثرة الحضور ..

وخصوصاً حضور معلماتي (أبلة عائشة وأبلة هالة) وناس أقدرهم كثير أعجز عن حصر أسمائهم.. صديقاتي.. الأقارب..

الحمد لله تونسنا..

بس تعرفون الرياجيل.. بسرعة بسرعة.. خلصوا الوليمة ورأساً جوي على قاعة النساء..

الزفة جانت حلوة والحمد لله..

مخليت شي ببالي.. زينا السيارة.. وفرينا على البحيرة والناس كومة ويانة، حتة وكفوا بالشارع ونزلوا من السيارات.. كلش تونست لأن أول مرة أحضر هاية الفقرة، كل مرة من نحضر عرس احنة أول المعازيم اللي نطلع ومنحضر الزفة، فهالمرة حضرتها مع سبق الإصرار والترصد.. طبعاً لأنها زفتي!

بعد سبعتنا، وفي اليوم الذي يسمى عند العراقيين يوم السبعة، جنا بالدوام، حيث أننا في بلد رأسمالي، وكل شي محسوب بالملي!

بعد أسبوعين، رحنا للعمرة، الحمد لله على نعمة أن نبدأ حياتنا من مكان رائع كهذا، ورغم أنها لم تكن أول عمرة لي، إلا أنها كان لها طعم آخر خاص، بالحقيقة شوية كانت مغامرة، وأحلة فقرة من أكدنا الحجز بالفندق بس وصلنا ولكينة ماكو حجز، وتبهذلنا بالشوارع بالوحدة بالليل، بعدين طلع الغلط مو من أحد، إنما من أبو التكسي اللي ودانة على فندق اسمه كلش قريب من اسم فندقنا المفترض، يمعودين...
بس الصدك ذكريات لا تنسى..
التقيت بالعمرة بأهل زوجي، خواته بالحقيقة، حيث همه هم طلعوا عمرة من العراق، والحمدلله نسقنا وياهم وشفناهم، وكلش فرحت بالتعرف عليهم بعد أن كانت علاقتنا تقتصر على دقائق معدودة على التلفون..
وحتة لا تكولون بس نتونس.. تخللت مغامراتنا في مكة والمدينة وقبلها ووراها بعض المنغصات..

الحمد لله اثنيناتنا نعرف نسوق..
يوم هوه يوديني للمستشفى ويوم آني اوديه..
يعني من باب شيلني وأشيلك!
الحمد لله والشكر..
وطبعاً ماما كلما أخابرها: أقرؤا المعوذات وآية الكرسي.. الله يحفظها ويخليها..
خلونة من هالحجي.. وخلي دا أشوفكم شوية صور.. تعرفوني أحب أصور..

صورة من الطيارة اللي انطلقت يوم 10/7/2010 من الشارقة إلى المدينة المنورة ..

صورة شوية الرزلوشن مالتها تعبان لأن مالت موبايل.. بس هي صورة جميلة كما ترون، الشمس دتغرب، والجو طيب، أمام المسجد النبوي والقبة الخضراء، وأريد ألفت إنتباهكم للمظلات المنشورة فوق رخام الساحات، لأن في روحاتي السابقة كانت المظلات موجودة في مكان واحد فقط، نسيت يا جهة، المهم بس هسه ديوزعوها حول الحرم من كل مكان، وهي رحمة لأن الشمس من تضرب على الرخام تكوم ادوخ .. جزاهم الله خير..
هندسة المظلات جداً بديعة، ما أدري من شنو مصنوعة، بس عدا عن الديزاين الجميل، فهل تنغلق وتنفتح أوتوماتيكياً .. فدشي رهيب ..
حقيقة من جنت جواها وجانت دتنطبك شوية وعبالي سفينة فضائية راح ينزل واحد أخضر بقرون استشعار وعيون لوزية!
مو علمود شي بس لأن شي هائل وديتحرك وحده.. يعني حقيقة شوية ممتعودين على هالتكنولوجيا!

زييييييييين .. ورة ما وصلنا، رحنة ثاني يوم في رحلة في المدينة المنورة، وهاية صورة جبل الرماة، وهو يقع بجانب جبل أحد الكبير الضخم، طبعاً هذا الجبل اللي صعدوا عليه الرماة الخمسين ثم نزلوا بعد ما عبالهم خلصت المعركة، نزلوا يجمعون الغنائم، وكان في هذا مخالفة لأوامر الرسول صلى الله عليه وسلم، وبقة بس عشرة رماة، التف من ورائهم خالد بن الوليد رضي الله عنه، وأخذهم على حين غرة، وبذلك انقلبت موازين المعركة..
وهنا أحب أنبه أنه المسلمين ما خسروا معركة أحد، إنما خسروا جولة فيها، حيث أنهم لحقوا المشركين والحقوا بهم الهزيمة في منطقة حمراء الأسد.. وبهذا حسمت المعركة لصالح المسلمين..
المهم راح تكولون.. أشو لعد يكولون جبل الرماة، بس هذا بس تلة!!
راح أكللكم من واقع مشاهدتي أنه الجبل دينزل، وبالفعل فالمرافق اللي ودانا كال نفس الملاحظة واللي هيه أنه الجبل كلش قل حجمه، والسبب هوه الناس اللي تكرف منه ما أدري على أساس يتبركون!
بلكي المسلمين ينتبهون لهاية الفقرة، فالتبرك ميكون بتراب!!
البركة تجي بالدعاء والذكر..
اللهم اهد جميع المسلمين ..

هاية صورة من المدينة، هنا سبحان الله افتهمت شلون كانت صورة استقبال الرسول صلى الله عليه وسلم لمن إجة للمدينة، حيث صعد أهل المدينة على النخل وبدأوا ينشدون:
طلع البدر علينا .. من ثنيات الوداع
سبحان الله المدينة مليانة نخيل ... ما شاء الله ..
طبعاً هذا مو شلال، إنما نافورة في وسط المدينة ..

مسجد قباء .. وهو أول مسجد بني في الإسلام، حيث بركت ناقة النبي صلى الله عليه وسلم أول دخوله المدينة عندما كان يقول: "دعوها فإنها مأمورة" ثم بركت أمام بيت أبي أيوب الانصاري رضي الله عنه، وأقام النبي صلى الله عليه وسلم هناك وبنى هذا المسجد ...

بعد قضاء يومين في المدينة، انتقلنا إلى مكة لأداء العمرة، وطبعاً هنا ماكو صور من النت، كلها آني مصورتها ..

هاية الصورة في مكة، في الحرم، في صحن الكعبة، راح أترك الصورة بدون تعليق لأن راح أفردلها موضوع إن شاء الله لأن الموضوع يرادله كومة تفصيل وأخاف تملون .. خلي نكمل الرحلة ..


صور الحرم من الخارج مساء ..
صورة ساعة مكة .. حيث كانوا ديبنون بيها ويومية نلاحظ الفرق، والحمد لله أطلقوها للعمل في أول رمضان .. وهي فدشي كلش هائل وتكدرون تشوفوها من جميع أنحاء مكة ..


أماكن كثيرة من مكة مزالة وكاعدين يسوون بيها مشاريع لبناء أبراج ضخمة تتسع لجموع الحجاج والمعتمرين، وهيه خطوة كلش ممتازة، لأن المناطق اللي أزالوها جانت بنايات بسيطة، خدماتها بسيطة، وكلش قديمة، والشوارع صاعد نازل، ومع تزايد أعداد الزوار، كانت هاية الخطوة لازمة، وكلش أحييهم عليها..

اسم المنطقة: جبل عمر .. مقابل باب العمرة



نهاية حد الحرم، هوه هنانة الحرم المدني، حيث رجعنا للمدينة حتى نرجع من هناك إلى الشارقة، وبكل الحزن ودعنة الحرم والأراضي التي عاش ونام ومشى وقاد فيها رسول الله صلى الله عليه وسلم وصحابته الكرام رضي الله عنهم ..
فمن هنا مشى الرسول ..
ومن هنا مر أبو بكر ..
ومن هنا خطب عمر ..
وهنا تبرع عثمان بماله ..
وهنا قاتل علي وصحبه سعد وعبد الرحمن مع رسول الله صلى الله عليه وسلم ..
شعور غرييييييييييب يعود بي للماضي المهيب ..
خجل وحرج من الرسول صلى الله عليه وسلم لو رأى حال المسلمين اليوم ..
ورغبة جامحة في أن نغير وجه العالم ليعود بنا لأمجادنا وقوتنا وهيبتنا السابقة، ليصبح للمسلمين مكان أفضل بين الأمم .. مكانة تليق بأمة النبي الكريم محمد بن عبد الله صلى الله عليه وسلم ..

انطلقت بنا الطيارة إلى الشارقة من مطار المدينة المنورة ..
وهاية صورة الشمس دتغرب واحنة فوك الغيوم (بمعنى الكلمة ، مو تشبيه بلاغي ) ..

********************************

اليوم آخر يوم رمضان.. ما أدري شلون بسرعة خلص.. والدليل هاية التدوينة بديت في كتابتها بأول رمضان وهسه دا أكملها!!

في بالي الكثير من الأفكار والمواضيع اللي أريد أكلمكم بيها وأحجيلكم عليها، بلكي يصير شوية وكت ورة رمضان ولو همه ناوين علينة خوش نية بالشغل ورة العيد، من باب يعصرونا حتة يطلعون كل اللي بينة!!

الله ييسر إن شاء الله ..

إجة العيد ..

مدري إحنة راح نروحله.. مثل ما جنة نكول وإحنة صغار ...

أتمنالكم عيد سعيد مليء بالفرحة والسرور.. عسى العراق يشوف عيد آمن وصدك سعيد..

عيد سعيد لأرامل العراق..

عيد سعيد ليتامى العراق..

عيد سعيد لشعب العراق..

وعيد سعيد لأهلنة بالعراق..

وعيد سعيد لكل المسلمين في كل مكان..

وكل عام وأنتم بخير ..

أحاول أشوفكم قريباً إن شاء الله ..

ودمتم بخير ..

ملاحظة: لحد يعلق على ترتيب الموضوع، تعبت وآني أحاول أقنع الكلام يطلع على اليمين ميقبل !!! ينراد أعيده وبعد ما كو وكت، تعرفون باجر عيد .. يلا غضوا البصر ^_^

صباحي خير .. مع عصافيرك ..



استيقظ في الصباح على مسج: صباح الخير حبيبتي ..

أفتح الشباك فتُحني النخلة سعفها لتلامس وجهي ..

وتمد شجرة الورد غصنها بالوردة البيضاء ذات الرائحة الخلابة لتغرسها في شعري ..

أما العصافير التي ترسلها .. فتزقزق عند نافذتي .. تغرد.. وتشدو أعذب الألحان ..

كلهم معي .. يعيشون لحظتي ..

صباح الخير والسعادة والسرور .................. حبي







عاد عصفور الحب ..
ينقر شباك القلب ..
بمنقاره الرقيق ..
يفتح للشوق طريق ..

ملاحظة: الصور والفيديو حقيقية من الواقع " من شباكي "

شلووووووووووون بالله ؟؟

هلاااااااااااااااو جماعة ..
شلونكم ؟؟
أخباركم ؟؟
أدري صار زماااااااااااااااان من حجيت وياكم ..
والله عندي كومة حجي .. لكن حياتي تمر بمرحلة صعبة شوية ..
حالياً أبني أسرتي الخاصة .. وأضع لبناتها الأولى مع خطيبي العزيز ..
التجهيزات على قدم وساق .. الحمد لله ..
ادعولنا بالتوفيق ^_^
بالفعل أفتقد المدونة .. وأفتقد الردود عليها ..
خوب إيميلي فوك الميت رسالة غير مقروءة ..
لكني إن شاء الله عائدة ..
تحياتي إلكم جميعاً ..
وهذا فيديو غريب كلت أعرضه عليكم .. واللي يعرف شلووووووووووووووووون ؟ يكولي ^_^

الإعلام الإسلامي .. نمطي أم متجدد ؟


بسم الله الرحمـــــن الرحيــــــم

ينظم مركز الأمير عبد المحسن بن جلوي للبحوث والدراسات الإسلامية
حلقة نقاشية تحت عنوان

( الإعلام الإسلامي .. نمطي أم متجدد ؟ )

بمشاركة نخبة من الأساتذة والإعلاميين الأفاضل
وذلك يوم الخميس 25/2/2010 الساعة السادسة والنصف مساءً
وعلى قاعة المؤتمرات في مبنى المركز
المحــــــــــــــــاور :-

- المحور الأول: هل للإعلام الإسلامي خصائص تميزه عن غيره؟ يقدمه: د. عماد زكي/ إعلامي

- المحور الثاني: كيف السبيل لإعلام إسلامي متجدد؟ يقدمه: أ.أحمد حبيب/متخصص في وسائل الإبداع الإعلامي الجديدة.


- المحور الثالث: آليات مقترحة للارتقاء بالإعلام الإسلامي. يقدمه: أ.محمد خالد/ إعلامي

- المحور المفتوح : المستقبل المنشود للإعلام الإسلامي. ( آراء الحضور والمشاركين )

ستمنح شهادات مشاركة للحضور

الموقع: الشارقة-الخان- شارع التعاون- خلف جريدة الخليج
هاتف 06-5776018
جوال 050-2703667
فاكس 06-5776557


والـــدعــــــــــــــــــــــــــــــــوة عـــــــــــامــــــــــــــــــــــــــــــة

متحف الحضارة الإسلامية - الشارقة

في إحدى الإجازات والتي أحب اغتنامها بزيارة لمكان من الأماكن الجميلة والمفيدة والمحترمة، وهم حتة أسهل على نفسي شرح شي لأخوتي فأذكرهم باللي شافوه بفلان مكان مثلاً.. سويت بحث بسيط على الجوجل، واختاريت متحف الحضارة الإسلامية، الحمد لله أن إمارة الشارقة تهتم بالثقافة والفنون والتاريخ وكل ما هو مفيد وممتع.. الله يجزيهم الخير.. بالفعل ياريت لو هذا الشيء موجود في كل مكان على الأقل يكون كأوبشن موجود إلى جانب الأماكن اللي اضيع الوقت والعمر والفلوس!
وإلى أن طلعنا إلى أن وصلنا جان باقي ساعة ونصف فقط لمشاهدة المتحف، واللي اعتقدت أنها راح تكفي، لكن طلع المتحف كبير وواسع ومليء بالأشياء، وآني من نوع أحب أقرأ عن كل قطعة إذا مو أتخيلها بمكانها بزمنها!
خلاصة القول أنه جانت فرة على السريع، وجريق جريق اشتغلت الكاميرة، طبعاً آني عبالي ممنوع التصوير مثل باقي المتاحف، ودورت بعيني على قطعة منا لهنا، كلشي ماكو، فأخذت راحتي على السرييييييييييييع والتقطت العديد من الصور..
المعروضات موجودة خلف الزجاج مما جعل بعض الصور تطلع فدشي مضوي بس محد يعرف شنوه! المهم إليكم بعض الصور الجميلة، واللي يريد يشوف بعد أو على الواقع خلي يتفضل..
الموقع وحطيتلكم إياه وحتة خارطة المكان موجودة على الموقع وساعات الدوام وكلشي ..
ويابة روحوا تونسوا وادعولي ..
يفضل طبعاً تعيشون كل القصص القديمة مع كل قطعة، مثلاً سيت الشاي جان يشرب بي السلطان العثماني، والجاي يا ترة جان شلون طعمه؟ من شنو يسووه؟ عاد والمطبخ العثماني الشهير! تخيلوا القصر والثياب والناس ..
عدكم خواتم كومة، وسوارات، وأدوات خياطة، وقلادة مالت أميرة تركية، بصراحة معجبتني صياغتها بس الظاهر هيه جانت عاجبتها، زين منية هاية الأميرة؟ قليل سامعين عن أميرات تركيات بالقصص، زين وين لكوهة الكلادة؟ جانت الأميرة دتمشي في حدائق القصر ووكعت من عدهة؟ لو أختها الأميرة عجبتهة الكلادة وضمتها غيرانة وتالي نست وين خلتها؟ لو يا ترى جانت هربانة من فد ثورة لو هجوم على القصر ووكعت منها الكلادة؟ لو يمكن افتدت نفسها بيها من الأسر؟
كلادة الأميرة التركية

أكو شغلات أقدم، من زمن الرسول صلى الله عليه وسلم، الواحد يتخيل، مقبض السيف هذا مسكه عمر بن الخطاب رضي الله عنه، شكد قتل كفره، شنو القوة العضلية اللي تخلي سكينة كبيرة اطير راس؟
أكو صور قديمة لمكة..
وأشياء جميلة جداً ..
مو أكللكم روحوا وادعولي؟
1- مسدس صنع من حديد منقوش وخشب، القرن الثالث عشر - الرابع عشر الهجري / التاسع عشر - العشرون الميلادي تقريباً، أفغانستان.
2- مسدس صنع من الفولاذ والنحاس والخشب، القرن الثالث عشر - الرابع عشر الهجري / التاسع عشر - العشرون الميلادي تقريباً، أفغانستان.
3،4- مسدس صنع من الخشب والحديد وأم اللؤلؤ، القرن الثالث عشر - الرابع عشر الهجري / التاسع عشر - العشرون الميلادي تقريباً، أفغانستان.

مصباح كهربائي صنع من الزجاج "البوهيمي" والنحاس، صنع للسوق الإسلامي (التركي أو الإيراني)، أواخر القرن الثالث عشر - الرابع عشر الهجري / أواخر القرن التاسع عشر - العشرون الميلادي، شرق أوروبا.

هاية ما مصورة الكلام الموضح للقطع، لكن مما أذكره أنها قوارير صغيرة كانت تستخدم لحفظ المواد الكيميائية أو الأدوية أو السموم.

8 - جزء من حجر محفور يستخدم للمكياج (ربما الكحل)، القرن الرابع - الخامس الهجري / العاشر - الحادي عشر الميلادي، مصر أو إيران.
9 - إسورتين فضة نقش عليهما اسم محمد وفيهما الميناء السوداء. القرن الخامس الهجري / الحادي عشر الميلادي، إيران.
10 - بلاطة من الفخار المزجج كتب عليها عبارة "بسم الله"، أواخر القرن السادس - بداية القرن السابع الهجري / أواخر القرن الثاني عشر - بداية القرن الثالث عشر الميلادي، إيران.

المدرسة المستنصرية، بغداد
إن المعرفة والتعلم أمران أساسيان في الحياة الإسلامية، وقد منحت الجامعات الأولى الطلاب فرصة دراسة القرآن الكريم ودراسة العلوم من علماء أكفاء. هذا مجسم للمدرسة المستنصرية في بغداد، التي بنيت سنة 625هـ / 1227م، والتي تعتبر أقدم جامعة إسلامية في العراق. وقد نجحت هذه المدرسة في النجاة من التدمير المغولي عام 655 هـ/ 1258م. أما اليوم، فهي جزء من متحف الثقافة والفن الإسلامي.

أدوات طبية تستخدم في الجراحات وطب الإسلام، مع نبذة عن تاريخ الطب الإسلامي.
إلنة الفخر أنه أجدادنا اخترعوا هاية الأشياء قبل الأجانب اللي يبيعولنا إياها حالياً بكوم فلوس!

سترتين من المخمل الأحمر المطرز بالذهب، القرن الثالث عشر الهجري / التاسع عشر الميلادي، تركيا العثمانية أو آسيا الوسطى.

قوس صنع من الفولاذ عليه أثر مائي ومطعم بالفضة، السهم صنع من الخيزران والفولاذ. القوس عليه كتابات فارسية، أواخر القرن الثالث عشر الهجري / أواخر القرن التاسع عشر الميلادي، الهند.
ليروح بالكم على روبن هود لأنه اسطور بريطانية سبقه إليها سعد بن أبي وقاص - رضي الله عنه -.
القرآن الكريم قبل أن يتم تنقيطه، لكن بعد وضع العلامات الحمراء التي تبين حركة الكلمة للحفاظ على معانيها والتي قام بها أبو الأسود الدؤلي بأمر من علي بن أبي طالب رضي الله عنه.

الأسلحة الحارقة والبايولوجية
كلما مضى العلماء المسلمون قدماً في تعلم استخدام البارود والمتفجرات أكثر كلما استطاعوا صناعة أسلحة أكثر تطوراً. لقد قاموا بإطلاق صواريخ وقنابل يدوية تحمل مواد كيمياوية حارقة، كما استخدموا المنجنيق لإطلاق نوع مبكر من الأسلحة البايولوجية. كانت قنبلة يدوية من الخزف مملؤة بمخلوقات سامة مثل العقارب والثعابين. إن ثقوب الهواء الصغيرة في قالب القنبلة اليدوية يشير إلى وجود حيوانات حية داخلها.


قطعة قماش، ربما القرن الخامس الهجري / الحادي عشر الميلادي، مصر.
جزء منسوج من أوائل العصر الإسلامي، مصر.

قدح فضة مزين بالمينا ورسم عليه مشاهد إيرانية وأنواط مزخرفة، هو جزء من طقم. القرن الرابع عشر الهجري / العشرون الميلادي، أصفهان، إيران.

نسيج من الحرير الأحمر وخيوط ذهب كتب عليها بالتطريز "بسم الله" في الأعلى و"عبد الله" في الوسط. 1332 هجري/ 1923 ميلادي، مصر.
وأمامها صورة السلطان عبد الله الراوي الذي طرزت له هذه اللوحة، نهاية القرن العشرين - بداية القرن الواحد والعشرين!

,
 

© Copyright يـوميـات مغتـربة . All Rights Reserved.

Designed by TemplateWorld and sponsored by SmashingMagazine

Blogger Template created by Deluxe Templates