كل عام وأنتم بخير .... مع ملخص ما سبق!


السلااااااااااااااااااام عليكووووووووووم ورحمة الله وبركاته

ها أنا ذا قد أتيت..

أقوى من الشدة..

أطول من المدة..

أهدأ من السكون..

أسرع من لمح العين..

عرفتوني ؟؟

أكيد آني مو أبو الحروف ..

شلونكم؟ أخباركم؟

وين ما وين؟

على كولة أتاوي خلي أتغدة بيكم قبل ما تتعشون بية..

هسه تكولون ها وين راحت؟ وين غطت؟

أدري مو كل الناس تتزوج أشو هاية اختفت!

حقيقة أفتقد المدونة جداً..

وعندي كثير مواضيع أريد أحجي وياكم عنها..

وخوب رمضان .. وما أدراك ما رمضان..

ما أدري إذا جنتوا وياية رمضان الفات.. بس بوكتها حسيت نفسي أنجزت..

جنت يومية أدخل المدونة وأكتب أشياء، وبوكتها سويت فقرة حدث في مثل هذا اليوم (أيام رمضان)..

هالرمضان سبحان الله مختلف..

أرجع من الدوام 5:30 يادوب على المطبخ ويأذن ونطلع على التراويح إذا بية حيل أو أصليها بالبيت وكذلك القيام، ونرجع ننام شوية حتة نلحك اناملنة شوية فد ساعتين قبل السحور..

نتسحر وهم ننام حتة نكوم للدوام..

الحمد لله والشكر ..

اليوم أوف .. يعني إجازة عندي ...

وغسلت الهدوم وكنست ونظفت وطبخت.. (وهم سويت زردة اليوم كحلو بعد الإفطار وهي حلوى مصلاوية - يعني من يم أهلي زوجي - علمتني عليها خالة)

المهم خليكم من الزردة ..

خلي دا أحجيلكم مخلص ما فاتكم..

الحمد لله تزوجنا يوم 20/6/2010 ..


وبهالمناسبة أريد أشكر كل شخص كتبلي مباركة على المدونة، الأمورة فيولا وشموسة الحلوة والأعزاء جميعاً ..

خلي دا أحجيلكم على العرس..

بالنسبة لي حسيت الحفلة خلصت بسرعة، ملحكت أسوي شي، بس أسلم وأبوس بالنسوان، وجوه أعرفها ووجوه ما أعرفها..

لكن أسعدني كثرة الحضور ..

وخصوصاً حضور معلماتي (أبلة عائشة وأبلة هالة) وناس أقدرهم كثير أعجز عن حصر أسمائهم.. صديقاتي.. الأقارب..

الحمد لله تونسنا..

بس تعرفون الرياجيل.. بسرعة بسرعة.. خلصوا الوليمة ورأساً جوي على قاعة النساء..

الزفة جانت حلوة والحمد لله..

مخليت شي ببالي.. زينا السيارة.. وفرينا على البحيرة والناس كومة ويانة، حتة وكفوا بالشارع ونزلوا من السيارات.. كلش تونست لأن أول مرة أحضر هاية الفقرة، كل مرة من نحضر عرس احنة أول المعازيم اللي نطلع ومنحضر الزفة، فهالمرة حضرتها مع سبق الإصرار والترصد.. طبعاً لأنها زفتي!

بعد سبعتنا، وفي اليوم الذي يسمى عند العراقيين يوم السبعة، جنا بالدوام، حيث أننا في بلد رأسمالي، وكل شي محسوب بالملي!

بعد أسبوعين، رحنا للعمرة، الحمد لله على نعمة أن نبدأ حياتنا من مكان رائع كهذا، ورغم أنها لم تكن أول عمرة لي، إلا أنها كان لها طعم آخر خاص، بالحقيقة شوية كانت مغامرة، وأحلة فقرة من أكدنا الحجز بالفندق بس وصلنا ولكينة ماكو حجز، وتبهذلنا بالشوارع بالوحدة بالليل، بعدين طلع الغلط مو من أحد، إنما من أبو التكسي اللي ودانة على فندق اسمه كلش قريب من اسم فندقنا المفترض، يمعودين...
بس الصدك ذكريات لا تنسى..
التقيت بالعمرة بأهل زوجي، خواته بالحقيقة، حيث همه هم طلعوا عمرة من العراق، والحمدلله نسقنا وياهم وشفناهم، وكلش فرحت بالتعرف عليهم بعد أن كانت علاقتنا تقتصر على دقائق معدودة على التلفون..
وحتة لا تكولون بس نتونس.. تخللت مغامراتنا في مكة والمدينة وقبلها ووراها بعض المنغصات..

الحمد لله اثنيناتنا نعرف نسوق..
يوم هوه يوديني للمستشفى ويوم آني اوديه..
يعني من باب شيلني وأشيلك!
الحمد لله والشكر..
وطبعاً ماما كلما أخابرها: أقرؤا المعوذات وآية الكرسي.. الله يحفظها ويخليها..
خلونة من هالحجي.. وخلي دا أشوفكم شوية صور.. تعرفوني أحب أصور..

صورة من الطيارة اللي انطلقت يوم 10/7/2010 من الشارقة إلى المدينة المنورة ..

صورة شوية الرزلوشن مالتها تعبان لأن مالت موبايل.. بس هي صورة جميلة كما ترون، الشمس دتغرب، والجو طيب، أمام المسجد النبوي والقبة الخضراء، وأريد ألفت إنتباهكم للمظلات المنشورة فوق رخام الساحات، لأن في روحاتي السابقة كانت المظلات موجودة في مكان واحد فقط، نسيت يا جهة، المهم بس هسه ديوزعوها حول الحرم من كل مكان، وهي رحمة لأن الشمس من تضرب على الرخام تكوم ادوخ .. جزاهم الله خير..
هندسة المظلات جداً بديعة، ما أدري من شنو مصنوعة، بس عدا عن الديزاين الجميل، فهل تنغلق وتنفتح أوتوماتيكياً .. فدشي رهيب ..
حقيقة من جنت جواها وجانت دتنطبك شوية وعبالي سفينة فضائية راح ينزل واحد أخضر بقرون استشعار وعيون لوزية!
مو علمود شي بس لأن شي هائل وديتحرك وحده.. يعني حقيقة شوية ممتعودين على هالتكنولوجيا!

زييييييييين .. ورة ما وصلنا، رحنة ثاني يوم في رحلة في المدينة المنورة، وهاية صورة جبل الرماة، وهو يقع بجانب جبل أحد الكبير الضخم، طبعاً هذا الجبل اللي صعدوا عليه الرماة الخمسين ثم نزلوا بعد ما عبالهم خلصت المعركة، نزلوا يجمعون الغنائم، وكان في هذا مخالفة لأوامر الرسول صلى الله عليه وسلم، وبقة بس عشرة رماة، التف من ورائهم خالد بن الوليد رضي الله عنه، وأخذهم على حين غرة، وبذلك انقلبت موازين المعركة..
وهنا أحب أنبه أنه المسلمين ما خسروا معركة أحد، إنما خسروا جولة فيها، حيث أنهم لحقوا المشركين والحقوا بهم الهزيمة في منطقة حمراء الأسد.. وبهذا حسمت المعركة لصالح المسلمين..
المهم راح تكولون.. أشو لعد يكولون جبل الرماة، بس هذا بس تلة!!
راح أكللكم من واقع مشاهدتي أنه الجبل دينزل، وبالفعل فالمرافق اللي ودانا كال نفس الملاحظة واللي هيه أنه الجبل كلش قل حجمه، والسبب هوه الناس اللي تكرف منه ما أدري على أساس يتبركون!
بلكي المسلمين ينتبهون لهاية الفقرة، فالتبرك ميكون بتراب!!
البركة تجي بالدعاء والذكر..
اللهم اهد جميع المسلمين ..

هاية صورة من المدينة، هنا سبحان الله افتهمت شلون كانت صورة استقبال الرسول صلى الله عليه وسلم لمن إجة للمدينة، حيث صعد أهل المدينة على النخل وبدأوا ينشدون:
طلع البدر علينا .. من ثنيات الوداع
سبحان الله المدينة مليانة نخيل ... ما شاء الله ..
طبعاً هذا مو شلال، إنما نافورة في وسط المدينة ..

مسجد قباء .. وهو أول مسجد بني في الإسلام، حيث بركت ناقة النبي صلى الله عليه وسلم أول دخوله المدينة عندما كان يقول: "دعوها فإنها مأمورة" ثم بركت أمام بيت أبي أيوب الانصاري رضي الله عنه، وأقام النبي صلى الله عليه وسلم هناك وبنى هذا المسجد ...

بعد قضاء يومين في المدينة، انتقلنا إلى مكة لأداء العمرة، وطبعاً هنا ماكو صور من النت، كلها آني مصورتها ..

هاية الصورة في مكة، في الحرم، في صحن الكعبة، راح أترك الصورة بدون تعليق لأن راح أفردلها موضوع إن شاء الله لأن الموضوع يرادله كومة تفصيل وأخاف تملون .. خلي نكمل الرحلة ..


صور الحرم من الخارج مساء ..
صورة ساعة مكة .. حيث كانوا ديبنون بيها ويومية نلاحظ الفرق، والحمد لله أطلقوها للعمل في أول رمضان .. وهي فدشي كلش هائل وتكدرون تشوفوها من جميع أنحاء مكة ..


أماكن كثيرة من مكة مزالة وكاعدين يسوون بيها مشاريع لبناء أبراج ضخمة تتسع لجموع الحجاج والمعتمرين، وهيه خطوة كلش ممتازة، لأن المناطق اللي أزالوها جانت بنايات بسيطة، خدماتها بسيطة، وكلش قديمة، والشوارع صاعد نازل، ومع تزايد أعداد الزوار، كانت هاية الخطوة لازمة، وكلش أحييهم عليها..

اسم المنطقة: جبل عمر .. مقابل باب العمرة



نهاية حد الحرم، هوه هنانة الحرم المدني، حيث رجعنا للمدينة حتى نرجع من هناك إلى الشارقة، وبكل الحزن ودعنة الحرم والأراضي التي عاش ونام ومشى وقاد فيها رسول الله صلى الله عليه وسلم وصحابته الكرام رضي الله عنهم ..
فمن هنا مشى الرسول ..
ومن هنا مر أبو بكر ..
ومن هنا خطب عمر ..
وهنا تبرع عثمان بماله ..
وهنا قاتل علي وصحبه سعد وعبد الرحمن مع رسول الله صلى الله عليه وسلم ..
شعور غرييييييييييب يعود بي للماضي المهيب ..
خجل وحرج من الرسول صلى الله عليه وسلم لو رأى حال المسلمين اليوم ..
ورغبة جامحة في أن نغير وجه العالم ليعود بنا لأمجادنا وقوتنا وهيبتنا السابقة، ليصبح للمسلمين مكان أفضل بين الأمم .. مكانة تليق بأمة النبي الكريم محمد بن عبد الله صلى الله عليه وسلم ..

انطلقت بنا الطيارة إلى الشارقة من مطار المدينة المنورة ..
وهاية صورة الشمس دتغرب واحنة فوك الغيوم (بمعنى الكلمة ، مو تشبيه بلاغي ) ..

********************************

اليوم آخر يوم رمضان.. ما أدري شلون بسرعة خلص.. والدليل هاية التدوينة بديت في كتابتها بأول رمضان وهسه دا أكملها!!

في بالي الكثير من الأفكار والمواضيع اللي أريد أكلمكم بيها وأحجيلكم عليها، بلكي يصير شوية وكت ورة رمضان ولو همه ناوين علينة خوش نية بالشغل ورة العيد، من باب يعصرونا حتة يطلعون كل اللي بينة!!

الله ييسر إن شاء الله ..

إجة العيد ..

مدري إحنة راح نروحله.. مثل ما جنة نكول وإحنة صغار ...

أتمنالكم عيد سعيد مليء بالفرحة والسرور.. عسى العراق يشوف عيد آمن وصدك سعيد..

عيد سعيد لأرامل العراق..

عيد سعيد ليتامى العراق..

عيد سعيد لشعب العراق..

وعيد سعيد لأهلنة بالعراق..

وعيد سعيد لكل المسلمين في كل مكان..

وكل عام وأنتم بخير ..

أحاول أشوفكم قريباً إن شاء الله ..

ودمتم بخير ..

ملاحظة: لحد يعلق على ترتيب الموضوع، تعبت وآني أحاول أقنع الكلام يطلع على اليمين ميقبل !!! ينراد أعيده وبعد ما كو وكت، تعرفون باجر عيد .. يلا غضوا البصر ^_^

7 التعليقات:

Sandybelle يقول...

الله, يابه الف الف الف مبروووووووووك وشايفه كل خير
وكوليله لزوج حضرتج مبروك عليك بنت الحلال مبروك عليك ملكة جمال
وكوليله, اختي شمس تشنقك اذا متداريني
لول
اتشاقه
الله يحفظكم ويحرسكم ويوفقكم بكل خطوه, اي والله كول النجاح والموفقيه,والرفاه والبنين ويوم تصيرين بيبيه زهوره, لول

يعني هسه تحجين مصلاوي؟ اشونكي؟ اخباركي؟ صحتكي؟
لووووووووووول

دمتي سالمه زهورتنا, واتونسي بكل لحظه بحياتج

3301 يقول...

السلام عليكم .. مُباركم عليكم العيد ومبارك لكِ الزواج والرحلة الى خير الارض مكة .. تقبل الله عملكم الصالح وجعلة في ميزان الحسنات .

IRAQI SPIRIT يقول...

باقة أزهار وورود..وسلة بخور وعود..والعيد عليكم يعود..وكل عام والعراق وانتم بألف خير، واسأل من اعد العيد.. وطوى الشهر الفقيد.. يمدكم بعمر مديد.. يجعل حياتكم عيد سعيد.فمباركة وسعيدة حياتك الجديدة، كللها الله بالولد الصالح والعمل الصالح أنشاء الله. سلامي للأهل وخصوصا عبدالله والوالدة. تحياتي

مها يقول...

السلام عليكم ورحمة الله وبركاته

حقًا تعبت من كثرت ما أفتح مدونتك ولا أجد جديد وسبحان الله اليوم قلت أجرب ووجدتك كتبتي ولم أتمالك نفسي لابد من القراءة للنهاية أولاً عندي مسابقة بسرد القرآن اليوم ولابد من المراجعة وآه لو تعلم معلمتي الحبيبة أن قرآني مفتوح وتركته وقرأت مقالتك إن شاء الله بتخلص عليه
مبروك لرجوعك لمدونتك ... أفتقدها .. وأفتقدك

أشراقة الأمل يقول...

السلام عليكم ورحمة الله وبركاته
عودا حميد يا غالية
أفتقدت أحاديثك في المدونة
والف الف مبارك الزواج وعقبال الذرية الصالحة

غير معرف يقول...

انا ساكن في منطقه تبعد عن المدينة المنور 500 كيلو تقريبا خمس ساعات في السيارة, وكل ماضاق خاطري خذيت سفره للمدينه ورجعت.

مبروك الزواج, ومبروك العمرة

attawie يقول...

ايبااااااه

الحال من بعضه.. انت رجعتي عمرة حضرتي عرسي و بعدين اني دخلت عالخط. يمكن لو انسخ موضوعك او اترجمة و انشره اسهل من ان اكتب موضوع جديد.

سبحان الله نفس الرحلة.. عندي صور نفس الاماكن بس من زوايا اخرى

احب اعلق على كل سطر كتبتيه بس الوقت و ما ادراك ما الوقت!

الحمد لله اتشاوفنا قبل سفري و ان شاء الله نلتقي مرة اخرى

كل عام و انت بخير و ان شاء الله الذرية الصالحة

 

© Copyright يـوميـات مغتـربة . All Rights Reserved.

Designed by TemplateWorld and sponsored by SmashingMagazine

Blogger Template created by Deluxe Templates