من أصلح ما بينه وبين الله .. أصلح الله ما بينه وبين الناس

اليوم راجعة من الداوم وإذا بي اشوف الجملة على لوحة بالشارع (بوستر) ما أدري يا جمعية مخليتها .. اللوحة كبيرة وواضحة الكتابة اللي عليها بحيث قريتها بلمحة وآني مارة ..
"من أصلح ما بينه وبين الله أصلح الله ما بينه وبين الناس"
لا إرادياً شلت رجلي من على البنزين، انصدمت .. يمكن قاريته وسامعته قبل هالكلام، بس ما منتبهة إله، صحيح نعرف أنه اللي يريد شي يمشي مضبوط يلجأ لله، لكن هاية الجملة!!
رجعت على البيت أفكر هل هو حديث أم مقولة أم شنو بالضبط؟

وجدت التالي على الإنترنت:

قال إمام أهل مكة في زمانه سفيان بن عيينة _ رحمه الله تعالى _ :
كان العلماء فيما مضى يكتب بعضهم إلى بعض هؤلاء الكلمات :
من أصلح سريرته أصلح الله علانيته ،
ومن أصلح ما بينه وبين الله أصلح الله ما بينه وبين الناس،
ومن عمل لآخرته كفاه الله أمر دنياه .

(رواه ابن أبي الدنيا في كتاب الإخلاص وأورده شيخ الإسلام ابن تيمية في أوائل كتاب الإيمان الكبير ج7 من مجموع الفتاوى )

الكلام كليته حلو ومؤثر .. لكن ما جعلني أقف كثيراً ويقشعر بدني هو "ومن أصلح ما بينه وبين الله أصلح الله ما بينه وبين الناس" حيث أني في أحيان كثيرة أشعر بالحيرة، وما أعرف شنو اللي المفروض أسويه؟ شنو المفروض وغير المفروض في علاقاتي مع الناس؟ شنية الحدود؟ شنو التصرف المثالي؟ أيو التصرف الخطأ وأيو الصحيح؟ شنو فهمت الناس من تصرفاتي وكلماتي؟ شراح يفتهمون؟ شحيكولون؟

أفكر كثير بأثر تصرفاتي وأحلل اعتماداً على خلفيات الناس واللي أعرفه عنهم، وأصير أريد أغير التصرف، والمشكلة ما أعرف أي تصرف أتصرف بداله .. يعني من الأخير فد هوسة ما إلهة أول ولا تالي .. وشما أسوي وأرتب واحسب احتمالات إلا يصير فدشي غلط.
فالله يجزيهم خير للجمعية المخلين البوستر.. عبالك مستقصديني.. لأني بالفعل محتاجتها وبشدة .. محتاجة رب العالمين يرتبلي أموري ..
وهذا أدعى أنه الواحد يستغل رمضان بقوة أكبر وطاقة أكثر ..

راح أعترف بفدشي............ عدنة بالشغل ما قللوا ساعات الدوام، وحسبولنياه أوفر تايم إجباري!!! مو هنانة المشكلة، المشكلة شغلنا يمرد القلب، يعتمد على الحجي وامتصاص غضب البشر .. مو مال أكعد ألغي 8 ساعات وأكثر!! شسوي .. المهم أرجع أسحل بروحي سحل، ما أدري أصلاً شلون دا أسوق وشلون دا أوصل .. أكو شوارع ما أتذكر إني شفتها وآني راجعة، لو جنت غفيانة لو انتقلت آنياً!!!

عموماً أوصل أوكع على السرير، رغم ما باقي وقت على الإفطار بس بثواني أكون دخلت عاشر نومة. يكعدوني على الإفطار بالغصب .. والله ما أريد مو جوعانة .. بس خلوني أناااااااااااااااااام .. طبعاً يذكروني بأمر الرسول صلى الله عليه وسلم بالتعجيل بالإفطار فيجيبولي سلنك ويشيلوني وأفطر (كل البيت يكومون بيه *_*). ورة الإفطار أكيد الوضع يصير أحسن بس هم ما بيه حيل لا أحجي ولا أتحرك.. أريد أناااااااااااااااااااااااااام!!
صار وكت صلاة التراويح، وأمي تحب تروح على الشيخ صلاح بوخاطر، طبعاً صوته حلو، وأحله شي أنه يدعي للعراق كلللللللللش تعجبني الصلاة هناك. بس يطوووووووووووووووول هئ هئ هئ ما بية حيل .. يقرأ كومة .. جيت أخرب أول يوم ..
طبعاً قبل الصلاة ميت فكرة براسي، خلي أصلي بالبيت، زين .. رب العالمين قال: يسروا ولا تعسروا، باجر عود روحي على المسجد، يمعودة والله إنتي تعبانة، وباجر هم دوام من الصبح، الرحمة .. اكعدي .. ما لازم تروحين .. زين روحي وصلي وانتي كاعدة مثل كبار السن!
بعدين أنتبه أنه الشياطين مكلبشة بجنهم عجل منو الديحجي ؟

هاااااااااااا أكيد لو من هالشياطين الصغار المفعوصين لو نفس أمارة بالسوء .. والله لا أشوفكم .. لو آني لو إنتو .. وأشلع نفسي (بمعنى كلمة شلع ذات الأصل الثلاثي والتي تعني قام بصعوبة شديدة جداً) وألبس هدومي وأروح..
الحمد لله اللي ييسر لي أعاندهم ..

بس ادعولي أكدر أقاومهم لآخر رمضان .. لأن كل يوم معركة جديدة .. على الأقل بلكي أقاومهم للعشرين من رمضان والعشرة الأواخر أخذت إجازة شحدهم يقتربون مني..
وتحياتي إلكم وربي يعيننا ويعينكم على العبادة والذكر..
أكوووووووووووووووووووول وين وصلتوا بالقرآن؟؟ خوما سبقتوني ؟؟ !_!