أشياء أفتقدها في رمضان الغربة

بائع زلابية في العراق

اليوم قبل الإفطار في لحظة سلام كلت خلي أستحي على نفسي وأروح أساعد بالمطبخ ، وهيه شغلة استقلت منها من بدة رمضان بسبب دوامي المتأخر .. من فتت للمطبخ حسيت أكو أشياء ناقصة .. فكعدت أتذكر شنو طقوسنا أو أجواءنا الرمضانية قبل ..
أولاً احنة البنات وية ماما بالمطبخ مشغلين إذاعة الشارقة، يكون أكو برنامج فتاوى أو مقابلة مع شيخ أو مثلها، لو هيه دتطبخ وإحنه على إيدها، لو مقسمين الشغل .. وحدة تثرم الزلاطة وحدة تحضر اللبن وحدة تقلب فدشي على النار وحدة ما أدري شتخلط، وماما تتنقل بيناتنا تلقي بلمساتها السحرية على كلشي، مثل الملكة الأم في خلية النحل .. وطبعاً شوية رزايل من نوع: باجر تكعدون على قلبي، منو ياخذكم؟ تكتل البشمايل!! واللخ لجعت التمن، متكولولي باجر شراح تسوون ببيوتكم؟؟ يولوا إحنة من جنة صغار جنة نسوي كذا وكذا وكيت وكيت ..
والله ميخالف ماما مو الأكل اللاجع أطيب :) شوفي آني شلون سويت فلان شي، ونكوم نرضي بيها هههههههههه
طبعاً مع بعض الملاسنات الجانبية الأخوية بيناتنا البنات ..
أو نقاش على فد فتوى أو كلام كاله الشيخ على الراديو ويعلى النقاش، فجأة يفتح بابا باب المطبخ: ولكم ولكم .. وصل صوتكم للضالين ..
يطبك الباب واحنة نبدي نتهامس وعادي ورة شوية يرجع يعلة الصوت ما أدري شلون!! :)
من نطلع من المطبخ نسمع صوت بابا يقرأ قرآن .. وبدون صوت بابا بالفعل ما أحس برمضان ..

نحضر اللبن وقمر الدين، وأخير ربع ساعة نحضر شغلات منا لهنا واحنة فاتحين التلفزيون على قناة الشارقة بانتظار إنهم يطلقون المدفع .. طبعاً أخير سنوات كمنا نشوف أعلام عراقية على خلفية المدفع، مما خلانا نكعد حتة بس نميز العراقيين من الوجوه.. عبالك تكولون كرايبنة!

ممكن نودي أكل للجيران .. أحد يدك الباب جايب شي .. وعلى مناسبة الأكل .. جنة ننجبر في رمضان ناكل أشياء كلللللللللللش حادة لأن طبعاً جيراننة هنود .. وخومة نذب الأكل ؟؟؟ طبعاً ناكل ونهفي :)

وذات مرة دا أودي شوربة عدس لجيراننا (أكيد محتعجبهم لأنه ما بيها بهارات)، وجان عمري يمكن 10 سنوات، فإذا بي أنبطح أرضاً مع الشوربة، ومو السبب أنه صار ضرب لا سمح الله، وإنما هو حادث قدري بحت :) ومن يومها وناطور البناية يرشقني برصاص من عينيه بس يشوفني :)

المهم .. نفطر كليتنه، أول شي نجيب التمر لبابا، ثم نفطر، ونصلي جماعة بالبيت وننتظر بابا يجي من المسجد، ونفطر سوة ..

لكن هسه .. صرنا عائلة مفككة .. :(

أولاً لأنه دوامات مختلفة ومتأخرة وتعبانين، وثانياً لأنه افتتحنا سرك قومي بالبيت حيث عدنة فرقة من ثلاث مهرجين، شي يطلعون من جوة القنفة، واللاخ بحركة بهلوانية يطلع من ورة القنفة ويكمز عليهة، واللي وراه ينسلت من يم المكتبة، ثم يكمزون على السراير ويركضون يميناً ويساراً .. بس بقة فقرة تسلق الحائط الأملس أو التعلق من السقف !! طبعاً مع العياط والمؤثرات الصوتية المدوية، مما خلة حلوكنة تصير رشاشات من كثر ما نكول هششششششششششش
بس لو أدري منين يجيبون القوة؟ لو ما صايمين!!! ما شاء الله عليهم ..
بالتالي بابا يأس من الوضع وصار يقرأ قرآن بالمسجد :(
والمطبخ صار نصنة نجي نلكيهم مخلصين طبخ وفعاليات .. لأن البقية كاعدين وعدهم إجازة ..
ووووووووو ما أدري .. بس همزين بعدنة نشوف المدفع ..
والحمد لله كليتنه نروح للمسجد على صلاة التراويح ولو كل ناس بكاع .. أكو ناس صاروا يروحون لدبي ويحضرون محاضرات .. وأكو ناس - مثلي - إذا دوام صليت بأقرب مسجد :( وإذا أوف أو دوامي خلص شوية كبل وكت أروح على بو خاطر ..

الحمد لله على كل حال .. بس هيجي إجة على بالي احجيلكم على أجواء رمضان في الغربة .. لأن أصلاً ما أعرف غيرها ..
بس أعرف أنه لو بالعراق يكون أكو يوم يفطرون يمنا ناس .. يوم نفطر إحنة يم ناس .. بيت خال بيت عم بيت جد .. أكيد تصير أكو تجمعات وشغلات .. وأتخيل سهرات رمضانية عائلية جميلة .. إيييييييييييييييه ..

همين الله يعين العراقيين على الصيام في هذا الحر الشديد .. على عدم توفر الكهرباء .. الله يساعدكم أهليتنا في العراق الحبيب .. وكل هلال رمضاني وإنتم بخير وعافية .. وأجر وثواب..