صدك غريبة .. وصدك العالم مليان أعاجيب .. بس خلي أبدألكم شوية شوية ..
بداية احنة نعرف أنه الحدود وما يسمى بالعيب يختلف من ناس لناس، بس اكو شي اسمه خطوط عريضة، ممكن نقسمها حسب العائلة .. المنطقة .. الدولة ..
طبعاً هنا مدا أحجي عن الغلط اللي الكل يعرف أنه غلط بس يسووه .. دا أحجي عن الوسط .. الناس الطبيعيين ..
راح أتجاوز العائلة لأن الاختلافات تكون على أشياء مو جوهرية .. فنجي على المناطق، أكو مناطق معروف عنهم أنهم محافظين وذولة تكون حدودهم معروفة وشوية ضيقة، أكو ناس وسط وأكو ناس فري، وأكو ناس أوفر فري، يعني الموزينيين حشانا وحشاكم.
بالنسبة للدولة، يعني الواحد لمن يجي يطلع على بلاد أوروبا يكون حاطط بباله شنو حدود الناس هناك، وشنو المقبول وغير المقبول، وحتة الأجانب رغم كونهم فري إلا أنه هم إلهم حدود، بيهم العوائل المحترمة اللي تحط حدود معينة لكنها تبقة أوسع من حدود العرب.
المشكلة وين؟
بسبب كوننا نعيش في دولة فيها كل جنسيات العالم وفوق ال 200 جنسية، خلانة هذا الشي نطلع على الكثير من الأشياء .. بعضها حتة توكف شعر الراس.
ما راح أكدر أحجيلكم الموقف اللي خلاني أكتب هذا البوست، لأن بالنسبة لي عيب أحجيه، لكني بشكل عام راح أوضح النقطة.
كنا في زيارة وحدة مصرية، من الصعيد ومعروف عنهم أنهم محافظون جداً، لأسباب ريفية واجتماعية بحتة، كما أنه البنية اللي كنا نزورها أنا وصديقتي ملتزمة دينياً، فزادت الحدود حدوداً ..
صار موقف وكان الحديث كأنما يجري عادي، صديقتي العراقية توقفت لحظات وكملت كلام، أما أنا فكنت أشعر بتنمل في أطرافي، ولا أعرف كيف كان شكل وجهي من الصدمة غير أني انتبهت لنفسي وابتسمت كما تستدعي اللباقة!
لكن ما كدرت أنطق بحرف حتى لو من باب لباقة! لباقة شنو عمي !! آني بحال لباقة آني؟؟
بالحقيقة بقيت طوال الوقت أفكر ..
الدنيا غلط ..
لو آني غلط ..
لو آني فطيرة ؟؟
ثم نفيت الاختيار الأخير لأن نفسي متسمحلي بيه، وأيضاً لأني وجدت دليل يدعم نظريتي، وأنه الحجي اللي جانوا ديحجوه الجماعة عيب ينحجة!!!
بس ليش هيجي صاروا الناس؟؟
ثم فكرت فكرة مهمة .. يمكن همه عدهم بالصعيد .. رغم تحفظهم عدهم هذا الشي عادي؟
بمعنى أنه كل جنسية إلها ثقافتها ..
وكل ثقافة إلها حدودها..
يعني هم أكو أشياء الشاميين مثلاً يشوفوها كلش عادي، بس احنة منقبلها، وأكول احنة كعراقيين .. حسب ما شفت وعرفت وسمعت ..
خلاصة الكلام .. لمة الواحد يتعامل مع الناس، لازم يحط في باله تسعليون شغلة، الجنسية، الحدود اللي تفرضها جنسيته، وشنو الأشياء اللي يقبلها، وشنو الأشياء اللي يعتبرها عادي والأشياء اللي تضايق، شنو الحدود اللي تفرضها بيئته، ثم نفسيته، وحساس الشخص لو لا ومنو شنو يتحسس وشنو يضوج وشنو لا.....
من هذا نستنتج أنه الواحد ميتعامل وية الناس أحسن!!
هههههههههههههههه لا أضحك عليكم .. بس ديروا بالكم .. خصوصاً من تتعاملون مع أشخاص مهمين .. على الأقل بالنسبة إلكم :)
وحاولوا تستخدمون مقاييس ستاندرد: فكل ما يرضي الله يرضيني، وكل ما يغضب الله يغضبني.
هيجي تطلعون منها .. وتكون في السيف سايد ..
ملاحظة كلللللللللش مهمة: لا قصدي أحجي على مصريين ولا عراقيين ولا شاميين... الفكرة وما فيها .. أنه لكل جماعة حدودهم وثقافتهم المميزة.
13 التعليقات:
والله يا زهرة خوش بوست .. وفكرة حلوة
اكيد كل واحد عندة حدود ومبادئ بالاضافة الى حدود دينة ومنطقتة وثقافتة
يعني الواحد دائما هو وفطرته ... وهناك يبيبن زين
صراحة اني مريت بالفترة الاخيرة بمرحلة خلتني اكتشف هواي حدود معرفها كبل ... معرف .. بس اكتشفت انو هي حدود سخيفة .. ومثل متدرين المجتمع اللي اني عايشة بيه كلش محافظ ... بس لو تجين للحقيقة اكو هواي حسد وحقد وغير اشياء محلوة تخليني انسى درجة المحافظة اللي بيه ...
" لو كنت فظا غليظ القلب لأنفظوا من حولك "
الله كريم .. نصبر والله يفظها .. الله مع الصابرين
يوم جميل زهورتي, شلونج عزيزتي؟ انشالله باحسن حال بارب..
طبعا البوست خلاني ابتسم ابتساااااامه عريضه.. عجيبه هالامور فعلا.. اني مثلا بالموصل عايشه وولدت همين, لكن جذوري مو مصلاويه, تدكرين تكولين اني شويه متحرره, وما البس حجاب, تشوفين هالشي كلش عيب هنا, البنيه المتلبس حجاب, ياويلها وسواد ليلها!!!! تتلقى دروس دينيه بالمجان, مرات توصل الحاله اريد بعد ماداوم ابد, صدكي, من المضايقات الجنت احصلها من كم مدرسه..
اما بالكليه , لا عيني, قرضا فرضا لازم البس حجاب, من الحجي ياعيني , هممممم..
اما شغلة غيرمحجبه في بغداد, فهالشي جدا عادي (وهم مو كل المناطق حقيقة) بس اكو شويه شي اسمه واحد بكيفه يلبس..
بس اني وارجع اكول " اكل الي يعجبك والبس مايعجب الناس!!!"
بوسه الج زهورتي, والبوست السابق بجيت من وراه لان كلش مشتاقه لبغداد. ماعرف, احس بشوق كبير للعراق بالرغم من كوني عايشه فيه..يمكن لان امي هي العراق, يجوز!!! الروح العراقيه البيها, كروح اي امراه عراقيه اصيله اخرى, السياب يكول في قصيدته كلام جميل اني اكرره لامي
" احببت فيك_ عراق روحي , او حببتك_ انت_ فيه.. يا انتما مصباح روحي انتما"
ديري بالج على نفسج..
هلا بفيوليتا وساندي بل..
قبل ما أجاوبج خلي بس أكوللكم شغلة، آني اكتشفت إني على حق، وأنه الكلام اللي انكال -في تلك الجلسة اللي أثارت الموضوع- ما كان المفروض ينكال، وإنه إذا انكال فهو بسبب جهل مو سوء نية، والجهل بالكثير من الأمور يخلي الواحد يلوصهة. بس شلون قررت إني صح؟
رجعت للجملة القياسية، ألا وهي ما يرضي الله يرضيني وما يغضب الله يغضبني، ووجدت بالحقيقة حديث لرسول الله صلى الله عليه وسلم يقول إنه من الخطأ الحديث عن هذه الأمور. طبعاً آني ما أريد أدخل بالتفاصيل، بس يكفيني أنه الرسول صلى الله عليه وسلم قال هالشكل. فعاد يكولون عادات.. تقاليد.. مجتمعات.. دول.. بطيخ .. آني ما إلي علاقة، همه جانوا غلطانين، والصح أنه يتم تنبيههم بأسلوب لطيف لكن مو السكوت مثل ما آني سويت، بس بالله آني جنت مصدومة، وخصوصاً من السهولة اللي انذكر بيها الكلام.
المهم .. نجي على تعليقج دكتورة .. الحقيقة آني متفهمة وضعج، إنتي مثل كثير ناس جوي هنا، طاكين من "الكبت" على كولتهم، والضيقة والحدود لأنهم من بيئة محافظة (سبحان الله هم من الموصل) المهم إني تعاطفت وياهم، لأنه آني أحب المحافظين والبيئة المحافظة لأنها أفضل لكني ضد خنق الحريات، مثلاً بعض الرجال يشوف المرية ميصير تسوق، زين أكو رجال معاهم حق لأن أكو نساء وحدتهم من تصير عدهة سيارة تصير على حل شعرها ولا تسأل بأحد، ولا تكول ولا تحجي على: آني أهلي واثقين بيه، وأني عندي حرية!
الحرية مو هيجي، كلشي إله حدود، لازم أكول لأهلي وين رايحة ومنين جاية، وما أتأخر عن ساعة معينة، وإذا ما قبلوا أروح فدمكان معناها عدهم وجهة نظر حتة لو ما افتهمتها لازم أحترمها.
لكن هم المجتمع لازم ما ينظر لكل مرية تسوق على أنها -مو زينة-، لا .. يمكن تسوق لحاجة وضرورة وكاظية شغل بيت بدل ما تركب وية أبو التكسي !
فإذن المسألة قياسية .. وآني ضد المجتمع المتحامل اللي يرفض كلشي لمجرد أنه شي جديد..
بس بنفس الوكت وعلى طيلة عيشتي في مجتمع وصخ، أحن ونفسي تتوق لمجتمع نظيف، شكو بيها نمشي بالشارع ما نشوف ناس مصاليخ؟ شنو الغلط لو العيب؟ شكو بيها ما أشوف ولد يتحارشون ببنات؟ أو بنات يتحارشون بولد؟ شكو بيها أمشي بالشارع ما أشوف نظرات من رجل لأمرأة بشكل مخزي؟ شكو بيها أمشي وما أشوف أحياناً أحضان وبوسات بالشارع؟؟
يعني بالحقيقة شنو ذنبي أنجبر أشوف هيجي مناظر؟
مو لو المجتمع محافظ على الأقل لمن أخوية يطلع بالشارع ما أخاف عليه من الحرشة ولا أخاف ليروح يشوف هاية المناظر، اللي لو جان صغير تلوث براءته، ويتربى عليها وتصير عنده عادي وباجر هوه يسويها؟ ولو جان كبير وغير قادر على الزواج شنو ذنبه يشوف هيجي شكول؟
الجماعة اللي بديت أحجيلج عنهم -المصالوة-، صار عدهم ردت فعل، وكالوا نرجع لمجتمعنا المتخلف أحسن ميت مرة من الوصخ اللي هنا، وبالمناسبة .. خسروا أخوهم، حيث أنه جان مراهق، ويعني ردت فعله على المجتمع وانفتاحه كانت قوية بحيث مخلة شي غلط مسواه!!
آني أعتقد أنه المجتمع لازم يكون شوية عقلاني اكثر، ويتقبل المرأة، والمرأة لازم تصير عقلانية أكثر وما تاخذها فرصة وتفسد وتطغى في الأرض، وبنفس الوقت خنكة مجتمع منغلق ولا انفتاحة المجتمع المفتوح ..
وخذي كلام من مجرب..
من باب ذكر الشيء بالمثل، عندج مثلاً أبو الحسن في تعليق سابق كال: "تعالو شوفو شياطين الانس اللي يمي... مستحيل يعني بس خطية شيسوون هي الدنية حارة هل جم يوم كلش حيل هواية جدا " والكلام كناية عن الناس اللي نازعة كل هدومها، وهو انفتاح، وحرية شخصية، بس والله آني أعتبره اعتداء على حريات الآخرين لأنهم يجبرونا نشوف هاية المناظر المؤذية للنفس والعين والمعدة حتى!
أما عن الحقد والحسد، فهاية موجودة بين الناس المنغلقين والناس الفري، هاية ما إلها علاقة بانفتاح المجتمع وأنغلاقه، إلهة علاقة بطبائع البشر، واللي كل مكان يحتوي خليط مشكل منهم، فإذن الحقد والحسد بهارات لابد منها، وتزيد لمن الناس تكون ما عدهة شغلة ولا عملة!
ميعدل الحقد والحسد غير النفس الطيبة الطرية المحبة للخير حتى لو كانت مو ملتزمة.
ما أكول غير الله يحفظكم من مجتمع مثل اللي احنة عايشين بيه، ويحسن من مجتمعكم، ويرضيكم بكل ما هو خير لكم.
"الله كريم .. نصبر والله يفظها .. الله مع الصابرين "
والله من خاطري أصير حاكمة وأضبط المجتمع وأحط ضوابط وقوانين (كلها من القرآن والسنة) تخلي المجتمع يصير أحسن مجتمع بالعالم، ومن الواحد يعيش بجو نظيف يكوم يبدع، لأنه ما يكدر يضيع وكته هيج وهيج .. بس شسوي محد ينتخبني :(
عذريني لأن طولت بالرد بس لأن دا أناقض الموضوع المهم بصراحة ..
تسلمين وردة على التعليق، وأعتقد أنه آراءنا متقاربة نوعاً ما بعد ما قريت موضوعج الجديد مالت سيكولوجية أهل الموصل.
يسعدني مرورج على مدونتي :)
العزيزة ساندي بل ..
الحمد لله آني بخير .. إنتي شلونج؟ إن شاء الله صرتي أحسن؟
شوفي عيني .. آني ما راح أناقش مسألة الحجاب لأنه فرض وأكيد إنتي تعرفين هالشي، لكني راح آخذ جملتج هاية: "بس اكو شويه شي اسمه واحد بكيفه يلبس"
زين آني مع الحرية والديموقراطية، بس بما أنه البوست عن العيب .. فخلينة نتفق، أكو هدوم من هدوم .. هدوم الواحد يلبسها لأنه حر، ومحد إله حق يحجي عليه، لكن أكو هدوم (مخشلعة) من حق العالم بل ومن المفروض أن يتم الحجي والدك على هذا الشخص، لأن مثل ما ذكرت قبل شوية في ردي على فيوليت أنه المنظر يصير مؤذي. يعني أكو فرق بالعيب، هنانة بالإمارات ممكن تشوفين لبس مخشلع وحجاب، شلوووووووووووون؟ متفتهمين!! بس بالنسبة للعراقيات أعرف عراقيات كومة مو محجبات لكن لبسهم محتشم، فإذن هيه مو مسألة حجاب هنا وإنما مسألة حدود العيب، وشنوه العيب.
آني أفتخر أنه بالعراق مهما كان.. أكو حدود باللبس وأكو شي اسمه عيب .. بناء على ما شفته بعيني، وأعتقد هذا بسبب انغلاق المجتمع الفترة الماضية، لذلك أكول الإنغلاق أحياناً أحسن من الانفتاح، يعني في كل زمان ومكان وكل مجتمع موجودين الناس الموزينيين، لكن ما أروح بعيد وأكولج أنه هنانة أكو عراقيات أستحي أكول الله يسامحهم لو الله يهديهم، لبسهم مخزي لأقصى درجة، والمجون والفسق بفلس ونص، ويطلعون جروبات تشوفيهم يمشون بالسنتر، لو ملتمين يم السينما، وخليج من اللبس، خلينا بالتصرفات ...................... والله أستحي وأكوم أتجبجب ما أريد أحد يعرف إني عراقية، وفوكاها يمشون ويحجون بعلا صوتهم عراقي، والأعلام العراقية مدندلة من كل مكان، خزي والله، وتسمعين حجي الناس عليهم وهمه يكولون هذولة العراقيات، أو يكولون والله العراقيات حلوات أحلة من المغربيات!! يالله .. مو قصدهم الشعب قصدهم بنات الهوى، شي يغث ويفطر القلب والله. لو باقين على قبل، محبوسين أحسن من ذني المشايفات!!!
إيه وبعد هذا الحزن الشديد وصلت لتعليقج والبيت اللي استشهدتي بيه من قصيدة السياب، ورحت طلعت باقي القصيدة وقريتها، تجنن كأشعار السياب!
كلللللللللللش عجبني البيت، وعجبتني مشاعرج اللي خلت أمج هيه العراق .. إن شاء الله ترجعلكم معافاة مشافاة ..
الله يهنيها أمكم بحبكم إلها وحبكم لبعض ..
تسلمين على ردج، وما أدري دا أحس الأفكار بردي داخلة ببعضها، فإذا أكو شي ما مفهوم لو معترضة عليه خلي نتناقش .. يعجبني أسولف وياكم، ويعجبني نتناقش على الأقل احنة الواعين بالمصايب اللي حولنا، لأن على الأقل إحنة لازم نحدد المشكلة والعلاج .. حتة يصير خير بالأجيال القادمة ..
تحياتي لك عيوني ..
"آني أفتخر أنه بالعراق مهما كان.. أكو حدود باللبس وأكو شي اسمه عيب .. بناء على ما شفته بعيني، وأعتقد هذا بسبب انغلاق المجتمع الفترة الماضية"
عيوني زهورة الانغلاق سلاح ذو حدين و احد الادس ادفانتج ماتة انو الناس مثل ما كلتي يصيرون مشايفين وابرز مثال تصرفات بعض العراقين بسوريا بعد ان اصبحت ملاذ لكثير من المهجرين منهم!
اكو وحدة بنية صديقتي وهي من اهل بغداد هية بنفسها تنتقد المجتمع الموصللي لأن مأذيها هواي وبنفس الوقت تنتقد اللي يصير ببعض الجامعات العراقية ببغداد ، اتكول البنات هنال هل شوية ومصاليخ !!!!!!
شي يقشعر له البدن قرفا .!..!.!
وهية خطية جانت متلبس حجاب وهل السنة قررت تلبس وصادف ان لبست الحجاب مع جية اخوها هنا للدراسة بالموصل .. فأحد الgossip اللي طلع عليها .. انهو جانت لما لوحدها على حل شعرها ولمن جا احد من اهلها التزمت !
اني صراحة ناقشتها بالموضوع وكالت والله اني لبستة لأن اقتنعت بيه وامها اتوقعت يطلع هيج كلام عليها .. هذي العدم الرحمة اللي جنت داحجي عليها بالمجتمع ماتي !!
"بس بنفس الوكت وعلى طيلة عيشتي في مجتمع وصخ، أحن ونفسي تتوق لمجتمع نظيف، شكو بيها نمشي بالشارع ما نشوف ناس مصاليخ؟ ........."
طبعا من قريت هل افقرة صراحة انصدمت لأن ابد ما جنت متوقعة الامارات بيها هلشكل شكولات !!!!
"ربنا اتنا من لدنك رحمة وهيء لنا من امرنا رشدا" !!!
الله يهدينا الى الطرق المستقيم الذي يرضي وجهه الكريم
زهرة والله اني كلش يعجبني طريقة تعاملج ومنطقج تذكريني بأختي الجبيرة ...
وصراحة همين حجيتي كثير اشياء اعجز عن التعبير عنها مرات .. يعني بين قوسين " جنج بقلبي " هههه
يسعدني دائما التواجد بالمدونة ماتج :)
السلام عليكم
طبعا أني أؤيد موضوع الموصل لأنه أني عندي أقارب مصالوة وأصلا احنة قريبين جدا على الموصل...
بس فعلا اللي غير محجبة بالموصل شوية تنأخذ عليهة نظرة معينة ولهذا حتى اهل بغداد لمن يروحون تسيارة للموصل لازم ياخذون وياهن عبي (جمع عباية)..
على طاري العوائل المحافظة، أكو ولد صاحبي ديحجيلي عن صاحبتة اللي من عائلة محافظة (طبعا هو مو عراقي)، ويكول أنه هاي البنية من عائلة جدا محافظة و متزمتة مننوع تتخيل أنه اهلهة ما يخلوهة تتاخر من نطلع سوة بس ليحد الساعة 12 بليل!!!
تخيلو...
يعني هي فروقات بين المجتمعات لكن عموما ست زهرة الوجه الجينكو اللي لبستيه لهذولة الجماعة هو الرد المناسب بحسب نظرتي للموضوع
I liked this post. you know Zahra this is the problem of the world, especially the arabian world. I don't know why people start to forget with is 3eb and what is not. I think because most people of the world have to faces, when they need, they change the faces anytime it required.
very nice post Zahra, I liked the way you dealed with the event. 3'alsi as much as you can if you see people act this way.
what is 3eb for us as Iraqis and coming from Arabian society is 3eb for all the islamic and Arabian wolrd. in Egypt, Syria, Iraq and all the countries. But what you can do to people who have been affected and changed by other traditions and society. anyplace you go and any people you meet, you have act and behave according to your traditions. I really respect those people who still strong and do not change what they are if they leave their countries.
sorry for writing in english, I have no arabic kyebored on this bad computer :)
شوفي زهورتي, عيوني انت
اولا, اني من اكول ماريد حجاب, مو قصدي انو اكرها او من هالحجي, لا بالعكس, وانما كل منحجبه على راسي وبنص قلبي, ولكن الي ديصير, ديقيسون اخلاق الفتاة على حجابها, يعني هنا الممحجبه موينه, وحتى لو تكبر محد يفكر بيها بالزاوج , وحتى بالجامعه, اذا بنيه تحجي ويا ولد او تضحك, يا عييييييب
اكو ولد طالب امي , راد يتزوج , واختار بنيه, ماما كلتله نعم ما اختاريت, لان احنا نعرف البنيه واهلها, صدك يروح على اصدقائه يكللولهو شدتسوي؟؟؟؟؟؟ هاي جان عدها علاقه ويا فلان
تروح ايام وتجي ايام, جان الولد الفلان بس محتاج مساعده بفد موضوع عن التشريح وهي ساعدته.. سووها علاااااااااااااقه!!!!!
اخ, اخ اخ, راح احتقن
وشيكلوله, هاي تلبس بنطرون فوكاه شي مو طويل!!!!
اني كمت اتبلعم من سمعت هالحجي من امي حقيقه
المهم, عقليات ومجتمع, اوف اوف
اما بالنسبه للشخلع مخلع, لا عيني, اني من اول المعارضين للخلع مخلع, اي لان شي غير اعتيادي, وغير طبيعي بتاتاو وخصوصا احنا بمجتمعنا, ودعينا عن المجتمع, مو حلو وحده تمشي بالشارع ومدري شنو, ابد مو حلو
بس احنا جماعتنا مشايفين, اي عذريني, من صار شي اسمه ديمقراطيه تشوفيهم راسا طبقوها على اللبس او حتى في ما يحرمه الله, بحجه ديمقراطيه, ونسوه المعنى الاساسي للديمقراطيه
اما الماجدات العراقيات, فالله عليهمو الله, اني ماروح بعيد لي يمكم بالامارات, اروح لدهوك, مدينه داخل العراق
اكو فد وحده بالمدرسه وياي هي واختها, فد يحجون بالدين حجي , مو طبيعي, خرافي, والحجاب ولازم ويجب, اني من باب المسياسه والمجامله اكول صحيح صحيح
اي عيني, لان اذا اناقش لازم احتاج كيلوين طماطه وبصل وفد جم قالب كيك, قليل ناس هنا يعرفون معنى النقاش
المهم, رحت لدهوك, واشوفلجياهن, شلابساااتتتتتتت؟؟؟؟؟؟؟؟ الله!!!!!!! ماشاء الله
الله يستر عليهن, ماكول غير شي, حتى همه تره جانوا يبينون ايري بالنسبه للبقيه
والله
بس شكول, اني الي عليه من شفتهم جنت لابسه اللبس الي الكل يعرفني البسه, لبس يعكسني وشخصيتي دون اي مبالغه, واني مجرد ابتسمت ابتسامه عريضه من شفتهن, وهنه كامن بس يضحكن بطريقه كلش غريبه!!!!
ههههههههههههههههههه
والله موقف!!!!!!!!!
فتكليلي على العراقيات؟ ليش بسوريه, هاي سوريه بالارض السعيده بدمشق, شيسوووووووون؟؟؟؟؟؟؟؟!!!!!!!!
اتصوري زهره حتى بالمدينه يشغلون فديو عام بتلفزيون عرض لرقص شرقي, والراقصه عراقيه والدك مال الانبار -القريب من نمط سعد الحديثي- فتشوفيني , طكيت, واحتقنت, ردت اكسره للتلفزيون, اكلهم لخواتي امشن ولجنو امشن, يكللولي شكو؟ اكول هيج هيج , بس امشن.........
شتكولين شتحجين ياعيني, والماجده بالسويد شدتسوي, بس الله يباوع على حالنا, نسال الله الرحمه, هاي كلها امور لا ترضي الله, استغفر الله, والله يازهره, يكلج "هم بيدحك, وهم بيبكي"
اني من ناحيتي, مو كل محجبه ادميه ولا مو كل ممحجبه مو ادميه.. يبقى الدين القلب, واكيد من اني عندي ايمان قوي بقلبي, مو بس ايمان بالله, انما ايمان بالطبيعه الانسانيه الي اني عليها, حأرتاح, واكيد هالشي حينعكس على لبسي, تصرفاتي, كلامي وغيره
لان الله سبحانه وتعالى ميأمرنا شي الا يكون انساني بحت, احزن على الي يسوون الدين فد معضله, والله الدين هو الحياة السعيده البسيطه بكل جوانبها
يعني اذا ملبست مشخلع مراح اموت, صح لو لا؟؟
شكرا لدعواتج الطيبه يا ورده "او يازهره!!!!! ههههههه" وامين الها
اكين ابادلج نفس الشعور
هذا مقطع كامل من القصيده, والله سويتيلي واهس, حأنشرها هي وكم قصيده لخ احبها في بوست...
أحببت فيك عراق روحي أو حببتك أنت فيه،
يا أنتما مصباح روحي أنتما - وأتى المساء
لو جئت في البلد الغريب إلى ما كمل اللقاء!
الملتقى بك والعراق على يدي... هو اللقاء!
شوق يخض دمي إليه كأن كل دمي اشتهاء
جوع إليه كجوع كل دم الغريق إلى الهواء.
شوق الجنين إذا اشرأب من الظلام إلى الولاده!
إني لأعجب كيف يمكن أن يخون الخائنون!
أيخون إنسان بلاده؟
إن خان معنى أن يكون فكيف يمكن أن يكون؟
الشمس أجمل في بلادي من سواها، والظلام
- حتى الظلام - هناك أجمل فهو يحتضن العراق
إذا أمكن تحطيلنة اللستة الكاملة مال أحداث رمضان، لأنه مرات انسة شنو اللي جان في يوم 8 مثلا واريد اسولف بالحدث أو اتوسع بالبحث عنه...
دايمين وشكرا جزيلا
العزيزة دكتورة فيوليتا..
"الانغلاق سلاح ذو حدين" كلللللللللش وياج بهاي الجملة، أصلاً جان زين لو نكدر نلكي فد مجتمع وسطي، لا متشدد ومتعصب ولا متفتح .. بس منين يحسرة؟
يعني مثل ما تكول صديقتج اللي تنتقد المجتمعين، لا هذا ينراد ولا ذاك.
لذلك آني لو يخيروني (منفتح لو منغلق) مع كل عيوبهما، أفضل المنغلق، بالتأكيد مو معناه صحيح، لكنه أهون النارين.
أما صديقتج اللي الناس تحجي عليها لأن تحجبت مع مجيء أخوها، فهوه طبعاً مو من حقها الناس تحجي، وصحيح المجتمع المنغلق يريد حجة ديحجي على أحد، بس أريد أسألج هوه منو سلم من لسان الناس؟؟؟
يعني آني هنا بالغربة، ومعارفنا مو كثار، ونوعاً ما بعيدين عن مجتمع العراقيين لأن ملتهين بدواماتنا المستمرة، ومع ذلك يخابروج ناس .. يتعنون يخابروج ديغثوج!!! حجي بأمور ما تخصهم وياكلوج ويشربوج، آني أكول ناس فاضين، يريد يملون وكت، أضوج منهم بس أجاملهم وأتحملهم، قابل شنسوي؟ دخلي الحجي من هالأذن وطلعيه من اللخ وريحي بالج!!
يعني يوصلنا حجي يوكف شعر الراس، ولا إله أي أساس بتاتاً !!!! بس كلمن يتصرف وية الناس بحسب أصله، قابل أنزل نفسي وأناقشهم لو أحجي؟؟ المهم ربي .. راضية ربي .. الله يكفيني لسانهم، بس هم ينرادلها قلب أنه تتحملين الحجي وتكدرين تتجاهليه.
"طبعا من قريت هل افقرة صراحة انصدمت لأن ابد ما جنت متوقعة الامارات بيها هلشكل شكولات !!!!"
عزيزتي .. الإماراتيين أهل البلد أغلبهم ناس بدو وكلش محترمين، وكلش محتشمين، بس هنانة ما تشوفيهم، اللي تشوفيه بالشارع همه مو أهل البلد، مو مثل العراق، أهل البلد همه اللي بالشارع، هنانة الكثافة السكانية الغالبة (هنود، باكستانيين، بنجلاديشيين، أفغانيين)، بعدين تجي الجنسيات العربية كلها، ثم الجنسيات الأفريقية والأجنبية، وتخيلي كل هالثقافات، وكل جنسية إلها عاداتها وتقاليدها، و"حدود العيب مالتها" لذلك كلت درس من الغربة، لأن بالغربة تعيشين وية كل هالناس، أحياناً تنسين إنج في بلد عربي أو مسلم، واللغة الرئيسية هنا هيه الإنجليزي مو العربي!!!
وطبعاً بعد ما هسه ديحاولون يتطورون فيجيبون خبراء أجانب وينطوهم آلافات يعني مثلاً راتب فد 10 أشخاص من الجنسية العربية، وبعدين يكولولهم "سمعاً وطاعة" وهذولاك ديخيطون ويبيطون بكيفهم، وبيهم اللي يجون بأفكار يهودية ومسيحية، وبيهم والله ما عدهم شهادات، وهاهية يصيرون يفرضون ثقافتهم الدخيلة على أهل البلد، وذولي يكولون "هاااااااا هيجي التطور!!!!" وحسبي الله ونعم الوكيل.
أهل البلد الأصليين بيهم كثير محافظين، والكثير من بناتهم يلبسون النقاب، تخيلي الآن صدر مرسوم تم على إثره استقالة الكثير من بنات الدولة، استقالوا من الجهات الحكومية لأن المرسوم صدر بمنع النقاب في العمل!!!!!!!!! وبالمناسبة لا يوجد مرسوم يمنع السكيني ولا المصلخ من الهدوم!!!!
هاية الإمارات!!!
الله يدز لحكامهم بطانة صالحة، لأنه الحكام بيهم خير، لكن بطانتهم ومستشاريهم .....................
"ربنا اتنا من لدنك رحمة وهيء لنا من امرنا رشدا، الله يهدينا الى الطرق المستقيم الذي يرضي وجهه الكريم "
آميييييييييين يارب العالمين
"زهرة والله اني كلش يعجبني طريقة تعاملج ومنطقج تذكريني بأختي الجبيرة ...
وصراحة همين حجيتي كثير اشياء اعجز عن التعبير عنها مرات .. يعني بين قوسين " جنج بقلبي " هههه
يسعدني دائما التواجد بالمدونة ماتج :) "
احم احم .. كبر راسي D: ههههههههههههههه
هاية الكلمات راح أعتبرها وسام تكريم للمدونة، بارك الله بيج وبأختج ويحفظكم لبعض إن شاء الله .. أخت عزيزة وغالية :)
أخي الكريم أبو الحسن..
الموقف اللي ذكرته أكبر دليل على اختلاف الفدشي اللي اسمه "عيب" من مجتمع لمجتمع، والحمد لله على العيب مالتنة والله يحفظلنياه!
بالنسبة للوجه الجينكو، فآني وضحت أنه ما كان مقصود، وبالعكس برأيي "وأمر بالمعروف وانه عن المنكر واصبر على ما أصابك، إن ذلك من عزم الأمور" يعني حتى لو افترضت أنه راح يصدوني أكون على الأقل حجيت وبريت ذمتي، ويمكن كلامي يثير تساؤلات بمخهم تخليهم يدورون ويبحثون ويقرون ويعرفون الصح، وبحينها حتى لو ديكابرون أمامي، بس على الأقل راح يعرفون الحق.
طبعاً هوه كل واحد وحسب شنو الشخص اللي كدامه ومستوى تقبله وطريقة طرح الموضوع وخلفية المستقبل أيضاً إن كان أوبن مايندد أو مجرد متعنت.
والله ييسر للجميع فعل الخير ..
شكراً على الاقتراح، وإن شاء الله أنزل الأحداث في بوست.
عزيزتي ميشو .. أهلاً بيج ..
تعرفين شنو .. آني مو غلست غلست .. آني من صدك جنت مصدومة، يعني صدك صدك ..
بس بعدين آني ليش كلت المفروض جان اعلق ولو تعليق بسيط، لأن ذولي البنات اللي دا أحجي عنهم بالحقيقة كلللللللللش طيبات وعلى نياتهم، والبنية اللي حجت الحجي متتخيلين شكد طيبة وتحب تتعلم وحتة هيه صغيرة عمر، وكلش تتقبل، فكلش جان واضح أنها حجت عن جهل، وجهلها بسبب اختلاف البيئة والثقافة، يعني يجوز عدهم بالصيعد جداً عادي يحجون هيجي شي، بس حتة لو كل القبيلة يحجون بيها مو معناته أنهم صح، فمجان بيها شي أحجيلي فد حجاية بأسلوب لطيف وابتسامة، يعني خصوصاً أنه أكو حديث شريف يؤيد كلامي.
"what is 3eb for us as Iraqis and coming from Arabian society is 3eb for all the islamic and Arabian wolrd. in Egypt, Syria, Iraq and all the countries. "
مو شوفي .. آني جان عبالي كليتنة نفس الشي، بحكم كوننا دول متجاورة وكليتنة مثل ما تفضلتي ننتمي للثقافة العربية الإسلامية، بس الحقيقة شوفي اللبنانيات يعني العيب مالتهم كلللللللش بعيد عن مالتنة، المصريين أكو ناس وناس، دول المغرب عدهم أصلاً مثل الأجانب البنية يصير عمرها فوق ال 18 تطلع من البيت وادبر راسها، أكيد مو الكل بس يعني أكو هيجي ثقافة عدهم.
بنفس الوكت إنتي إثرتي نقطة كلش مهمة ألا وهي الناس اللي عدهة حدود وعيب وما عيب، ومن يطلعون برة متدرين شيصير، كليته يذبوه ورة ظهرهم، يابة شنو صار؟؟؟ يكلبون وجههم طبعاً همه على أساس اطوروا!!!
أنضم إلج في احترامج للناس اللي حافظوا على أخلاقياتهم وأصولهم مهما كانت المغريات والثقافات اللي حولهم، والله يجعلنا منهم إن شاء الله.
أشكرج على التعليق، وهلا بيج بالعربي وبالإنجليزي :)
هلا بيج ساندي بل.. كولي عيوني إنتي ..
زين... آني افتهمت عليج، لذلك كتلج إنتي تعرفين أنه الحجاب فرض، وأكيد ما راح توكفين ضده، لكني مثلك أؤيد الحرية، بس هم بحدود، حتى لا تصير زيطة وزمبليطة، وتصير الحرية سلبية ..
بكل بساطة آني أعيش في مجتمع منفتح، واللبس قضية تجاوزناها لأن أكو أفعال شنيعة ترتكب في الشارع ماكو داعي أحجي بيها من جديد، وهمه يسووها من باب حرية!!!!!!!!!!
فآني مثلج أكول الحرية حلوة بس بحدود، وكل الأنواع موجودة، المحجبة الزينة، والمحجية الموزينة، والمومحجبة الزينة، والمومحجبة الموزينة.
"او تضحك, يا عييييييب" آني هاية بصراحة غير؟ آني وية الحجي، يعني حجي افتهمنة، بس ضحك؟ يعني أحس يصير أكو تباسط وتساهل ويوم عن يوم يصير غير شي، شي ميقبله -مو المجتمع- لأن معليه بيه، شي ميقبله رب العالمين.
أما عن طالب أمج، فهوه صوجة ما سأل، يعني الواحد ياخذ كل كلمة يكولوهة الناس؟؟؟ جان لازم يتحرى ويتأكد!
"ودعينا عن المجتمع, مو حلو وحده تمشي بالشارع ومدري شنو, ابد مو حلو"
مو بالله؟؟
"بس احنا جماعتنا مشايفين, اي عذريني, من صار شي اسمه ديمقراطيه تشوفيهم راسا طبقوها على اللبس او حتى في ما يحرمه الله, بحجه ديمقراطيه, ونسوه المعنى الاساسي للديمقراطيه"
عفية عليج، يعني صارت الشغلة بلي ملح، أدري شنو ميفكرون؟؟ ميكولون؟؟ ليش لعد الله انطانا العقل؟ أشو آني هنانة لو أريد أطلع هسه بشورت وسترابلس قصير محد يحجي عليه، بل على العكس راح يعتبروني متطورة، عندي الحرية إني أسوي اللي أريده وحتة المجتمع ما راح ينتقدني، بس آني عقلي براسي !!!!
أصلاً هنانة إحنة نتعرض للنقد أحياناً بسبب الحجاب، لأن مثلاً مو ألوان جذابة ولأن مو حصر ولأن ولأن .. بالعربي لأن حجابنا حجاب شرعي!! يعني حتى المقاييس انكلبت، وصار النقد يوجه للإنسان اللي ديسوي الشي صحيح، ولا يوجه للمخطئ!!
أما عن العراقيات بدهوك وسوريا والسويد وغيرها من بلدان العالم، فمثل ما كلنا، كل مجتمع بالعالم بيه الزين والموزين، آني اكول السياسة السابقة جانت اطمطم على الفضايح وجانوا الناس من يسمعون عراقي يتخيلون الكدامهم عالم ذرة، ومخترع، وقمة بالعلم والأخلاق والأصول، بعدين اكتشفوا (بعد الاحتلال) إنه العراقيين شعب طبيعي بيه كووووووووومة ناس مو زينين وكووووووومة ناس أغبياء :)
فعادي الوصخ يطفوا ويعلو بس يجيله يوم ويوكع وينفضح.
وإن جان عارضين بالتلفزيون الركص، حبيبتي هنانة، في شوارع الشارقة اللي هيه نوعاً ما ملتزمة، دكوا وركصوا بالشارع على أساس فرحة مشروعة بمناسبة فوز المنتخب العراقي ويا سوووووووووووووواد الوجة، كامت الناس تحجي بينه!!!!
"يعني اذا ملبست مشخلع مراح اموت, صح لو لا؟؟"
لا لا لا يمعودة شنهالحكم !! بالضبط ..
الله يسلمج وشكراً على مقطع القصيدة .. وهلا بيج.
إرسال تعليق