The Duchess

شاهدت البارحة فلم "The Duchess" أو الدوقة ، بعيداً عن اللقطات الكثيرة اللي طيرت نصه ، وبعيداً عن تمثيل كيارا نايتلي اللي شوية متحسن ، لو نظرنا لقصة الفلم ، اللي يكولون مأخوذة عن قصة حقيقية ، نكول ألف الحمد لله والشكر أنه احنا مسلمين. طبعاً جانوا يعاملون النساء برخص شديد ، وما كو إلها أي تقدير ولا حتى كبشر عادي.

بس اللي لفت نظري بالقصة وعجبني ، هو أنه رغم أنه كلشي عادي عدهم ، من حبيات وعلاقات وإلخ ... ، إلا أنه الدوقة ضغطت على روحها كلش حتى تبتعد عن الشخص اللي حبته ، وطبعاً يعتبر هذا في عرفهم من النبل والتربية الصحيحة والأخلاق الكريمة النابعة من مكانتها في المجتمع.

سواء سوت هذا الشي من أجل أبناءها أو من أجل حبيبها نفسه (اللي هدد زوجها أنه راح يطرده من كلشي ويأذيه ) ، أو من أجل كرامتها ، إلا أنها كبحت زمام نفسها وتركته .

هذا خلاني أفكر ببنات هاليومين ، طبعاً وجه المقارنة ما راح يكون مثل ما بالفلم والعياذ بالله ، لكن أقصد الفكرة ، واللي احنا المسلمين أولى بيها ، حالياً البنت لمن تعجب بشاب ، تحاول تغريه وتفرض نفسها عليه ، ويمكن هيه اللي تكول له مشاعرها أو (تصارحه) مثل ما يكولون !!!!
هذه حقيقة مفجعة ، شفتها أول ما شفتها بالجامعة !
طول عمري أعرف البنت مهما عجبها شخص ومهما كنّت له مشاعر ، لازم تتصرف بلباقة وكرامة ، وما تسمح لشيء مما في نفسها أنه يطلع أمام أي أحد مو عاد الشاب نفسه !
أما الشاب لمن تعجبه بنية ، فأيضاً ما يفرفر ويلف ويدور ، إما يخطب ويكمل أو يبتعد.
لكن حال شبابنا هاليومين كليته علاقات محرمة ، ومصارحات - يا عيني - ، وأحياناً البنية هيه اللي تبدأ من باب جرأة وصراحة ، وأنه الحقيقة لازم ما تتخبى ، وإلى آخره من التبريرات اللي لمن سمعتها شاب شعر راسي .

بصراحة جنت متوقعة الفلم ينتهي أنه تهرب الدوقة وية حبيبها ، يعني هذا المعتاد بالنسبة لفلم أجنبي ، لكنها داست على نفسها وكملت حياتها بكل صمود ، وآني أكول صمود لأني أتخيل كم سيكون من الصعب أنه الإنسان يحب شخص ويضطر ينزعه من قلبه.

مو مديحاً بالدوقة اللي لا أعرفهة ولا تعرفني ، لكن هذا النبل وهذه الأخلاقيات كانت موجودة عند هذول اللي ميحترمون المرأة واللي يتعاملون بأسلوب شبيه بالحيوانات ، بينما احنة أولى بهذه الأخلاقيات وهذه التصرفات.

يعني هنا مدا أستنكر وجود المشاعر ، لأن الإنسان بشر وإلا يتأثر ، لكني أتحدث عن ضبط النفس ، وعدم تسليم الأمر للرغبة وما تشتهيه النفس ، لأن هذا هوه الفرق بين البشر والحيوان ، العقل اللي يضبط كلشي .

وبالطبع لو أخذناها من ناحية الشخص نفسه ، يعني البنت تورط نفسها وتصارح الولد على أساس هيه جريئة بينما هيه تتخلى عن شيء غالي من نفسها ، والولد يصارح البنية على أساس أنها لازم تعرف وهوه ما ناوي يخطب ولا يتزوج ، ويعيشون قصة حب طويلة ، وعبالهم مثل كل فلم مصري راح يتزوجون بالأخير - دون تخطيط ولا ترتيب جاد - ، ثم ينصدمون بالواقع ، ويوكعون على وجووههم ، ويصيرون يصممون صور بيهة ناس يبجون أو وحيدين على درج أو دماية مطشرة من قلب مكسور ، وريشة طايرة أو ما أدري شنو ، ويكتبون : المجروح ، القلب المكسور، القلب المحطم ، جرح الزمان ، مصيبة العصر ، ويعني من الذي هوه !

الحمد لله على نعمة العقل والأخلاق وضبط النفس ، والله يهدي جميع شباب وشابات المسلمين ويبتعدون عن هاية التفاهات اللي راح تجيب آخرتنا كأمة إذا التزمنة بيها ، وخليناها هيه الأساس في حياتنا ، واللي من أجلها نعيش ، ناسين أو متناسين قضايا على كواهلنا ، تنتظر منا الرجال والنساء ، كالعراق وفلسطين والبقية تأتي !