"الويل لك .. سوف أقتلك"
"الضربة القاضية .. من الفارس الشجاع .. قاتل التنانين ومحرر الأبريااااااااااااااااااء .. فشوووووو"
"آآآآآآآآآآآآآه لقد أصبتني! سوف أنتقم .. انتظرني في المعركة القادمة .. سوف أنتقم"
"هاهاهاهاهاها .. لن تستطيع .. أنا دائماً الأقوى"
******
"طق طق طق"
"من بالباب؟"
"أم عبد الرحمن"
"يا أهلاً وسهلاً .. تفضلي .. تفضلي"
"كيف حالكم أم أحمد؟ "
" الحمد لله .. بخير كيف حال عبد الرحمن؟"
"الحمد لله .. صحيح أنه مُتعب قليلاً لكن الحمد لله كبر الآن"
"ما شاء الله .. الله يحفظه لك"
"شكراً .. ماذا تطبخين؟"
" المعتاد .. مرقة وأرز .. لكن اليوم مرقة الفاصولياء لأن أولادي يحبونها كثيراً"
" آه .. صحيح إنها مفيدة ما رأيك أن أساعدك في الطبخ ثم نذهب للتسوق؟"
"جميل .. فكرة رائعة .. هيا"
"هيا"
******
"أيها الطبيب الحقني .. لقد صدمت ابني سيارة"
"بسرعة بسرعة .. أين الممرضة .. ضعيه هنا من فضلك"
"أيها الطبيب .. لقد كان يعبر الشارع وجاءت السيارة مسرعة فصدمته وبدأت الدماء تسيل من كل مكان .. ساعدني أيها الطبيب إنه ابني الوحيد"
" أيتها الممرضة.. أحضري الضمادات بسرعة.. بسرعة حضروا غرفة الأشعة"
"جريييييييييييق .." <--- الأشعة :)
"همممممممممم إن عظامه بخير .. مجرد رضوض بسيطة، لكن سيبقى في المستشفى ليكون تحت الملاحظة"
"أوه شكراً أيها الطبيب .. هذا لطف منك"
"لا شكر على واجب"
*****
هسه راح تكولون شنو هاية المقاطع؟؟
بالحقيقة هاية مقاطع من ألعابنا لمن جنا صغار ..
تذكرون لمن جنا نلعب بيت بيوت؟ وناس تزور ناس .. ناس بيتهم جوة الميز، وناس ينصبون الفراش ويعيشون جواه؟ لمن جنة نطبخ ونقدم اكل (طبعاً هوائي لو كلش كلش خيار وطماطمة) ..
تذكرون لمن جنا نربط شرشف على أكتافنا على أساس أمراء، وحرب العصي على أساس سيوف؟ (الله يرحم أيام زمان، هسه السيوف بأبو الدرهمين والله خطية احنة)
ما أدري إذا جنتوا تلعبون لعبة الطبيب، وأدوات الطبيب، وعمليات ودماية، ولزكات ومغذي وأشعة..
وطبعاً لعبة البياع وبيع واشتري.
وآني أذكر جنا نكلب الكرسي ونسوي على أساس مركبات فضائية ورجل الكرسي طبعاً هيه مقود التحكم ..
يعني أكيد كل ناس إلهم ذكرياتهم المختلفة شوية .. بس أعتقد الكل مر بهاية المرحلة، اللي خلاني أرجع أفكر بيها هو اللي دا أشوفه بالشارع. شنو اللي دا أشوفه بالشارع؟
بعيداًَ عن الأخطاء اللغوية والإملائية في اللوحات .. اسمعوا لأطفال هالأيام شلون يحجون .. أقصد لمن يلعبون .. وتذكروا احنة شلون جنا نلعب!
الفرق جداً كبير من عدة نواحي ..
.jpg)
أولاً نوعية اللعب .. كليته عدائي، غير واقعي، يحتوي الكثير من الكلمات البذيئة، وبعيد عن اللغة العربية الفصيحة!
محد ينكر أنه لأفلام الكارتون أثر كبير في لغتنا، في تراكيب الجمل، في حصيلة الكلمات اللي نعرفها، طريقة استخدامها. أشياء يمكن متلاحظوها لأنكم اعتبرتوها شي طبيعي، لكن حتى نلاحظ الفرق كان لابد أن تمر هذه السنين، وراح أكوللكم في تدوينتي الجاية فدشغلة عن اللغة العربية وما آلت إليه .. من تجربتي الشخصية.
المهم تفاجأت من ثقافة أطفال اليوم، فقررت إني اطلع على الكارتونات الجديدة، ولعبت نفسي جداً جداً، أريد فد كارتون بي خير منا لهنا ماكو ..
كليتهة سخافة، الرسومات وصخة، الكلام لو شوارعي لو يصب في مواضيع بعيدة عن عالم الأطفال..
ماكو حتى قصة ..
يضحكون على عقل الأطفال خطية ..
يستهينون بيهم ..
ترة والله الأطفال عقلهم بسرعة ديكبر، ويفتهمون ويعرفون .. والله حرام هذا اللي ديشوفوه ..
ولذلك رأفة مني على أبناءكم وإخوانكم وأقاربكم .. قررت أدلكم على موقع بيه كارتوناتنا من جنا صغار .. نظيفة - أغلبها - .. جميلة .. وعلى الأقل على الأقل بيها قصة ..
طبعاً أعرف أنه تنزيل الكارتون شي صعب ومحد راح يديرله بال .. بس يعني اللي عدهم إمكانية ويريدون ..
والموقع طبعاً إهداء لساندي بل اللي تحب الكارتون ..
ولكل واحد يهتم أنه أطفال عائلته ميشوفون ما يثير الاشمئزاز ويصغر العقول ..
http://www.rosoom4ever.com/
وأكو هم جانل على اليوتيوب:
http://www.youtube.com/user/HeartBreaker32901
8 التعليقات:
حلو هذه المقال والله عاشت ايدج
الطفل هو ابن المجتمع القادم المجتمع ...
لمن كنت صغير الالعاب كانت
ركيضان وكعيدان كلها تنتهي باليف ونون واكو لعبة جنة نسميها شباطيط شوية خشنة طفولتي كانت مع بداية حرب الخليج الاولى بالثمانينيات يعني القادسية والكارتونات تغيرت الى صيغة حربية مثل كرندايزر وساسوكي وعدنان ولينا والغواصة الزرقاء وفارس الفضاء وبلبو عصابته الخطرة وكارتون خميني فصرنا نستحدث العاب جديدة في المدرسة وهي كرندايزر يعني نصير قسم جماعة كرندايزر وقسم جماعة فيكا الكبير وناس تضرب ناس وكان عدنا لعبة مال مجانين نسميها حرب يعني تنقسم المدرسة الى قسمين وناس تضرب ناس بوكسات وجلاليق وبالحجار وبعدين المعلمات يبصطونة كلنا وراها ...
نفس الالعاب بالعراق بس مرات اسمها يتغير يعني مثلا لعبة الركيضان يسموها حويدة في بعقوبة وهناك العاب خاصة في مناطق ولاتوجد في مناطق مثلا في الموصل ينقسم الاطفال قسمين ويغنون اغنية
ماتنطونا بنتكم يلعمارة العمارة ...
اما في البصرة او الجنوب فاعتقد لهم العاب اكثر من التي كنا نلعبها في بغداد ولكني لا اعرفها وفي المناطق الشعبية تختلف العاب الاطفال عن المناطق البرجوازية مثل الكرادة والمنصور وشارع فلسطين حيث تجدهم اقرب الى العاب اخرى مثل الشطرنج وسوف لاتصدقين اذا قلت لك اني كنت العب الشطرنج وانا في الخامس ابتدائي وكنا نلعب جلكة وهي مربع له صليب في الوسط ويكون الهدف في جعل القطع بشكل خط. اما الان فاعتقد ان عقل الطفل قد تخرب بسبب الكوارث الفكرية والحروب التي لازالت مستمرة فاني عندما اتكلم مع اطفال اجدهم لا يتكلمون الا عن القتل والسرقة كانها بطولات تاريخية مع الاسف والجيل الذي تخرب الان سيقوم بتخريب مستقبل العراق لحوالي السبعين سنة على الاقل اي الى ان ياتي الجيل الذي بعده ان كان مختلفا الله وحده يعلم ...
اثرت موضوع مهم اجتماعيا و نفسيا و في نفس الوقت له التأثير الاكبر على صقل جيل المستقبل.
مثلما تفضلتي الكارتون علمنه لغة و علمنا التمسك بالقيم الخصال الحميده في المجتمع. كنا نشوف حلقة عن الصدق و اخرى عن الامانه.
بالاضافة الى كثير من البرامج التعليمية للغة العربية.
طبعاً كل هالالعاب لعبناها مرات نفس الحوارات تنعاد و احيانا حوارات جديده. و شنسمع بالكارتون لو من الخطار يدخل باللعب. و من الالعاب الي عدنا كومه المدرسة. كنت اكعد الاقارب و الجيران و اسويلهم صف .. و اكو لعبات كانت بيبي تلعبنياها قبل النوم و اتصور كانت من احسن الالعاب الي ساعدنتا في حفظ جدول الضرب. كنا نختار رقم مثلا 7 و نبدي نعد و كلما نوصل لرقم سبه او عدد يحتوي على رقم سبعه و مضاعفاتها نقول بوم..يعني 1 , 2, 3, 4, 5, 6, بوم, 8 ...
اكو كتاب للمرحوم حسين قدوري للالعاب الشعبيه. يشرح بي الالعاب و اغانيها في العراق و محافظاته
يله طولت عليج بس الموضوع مهم و ان شاء الله نجد طريقة للارتقاء بأدب الطفل و الكارتونات الي ينشأون عليها حتى نطلع بجيل يحمل رسالتنا و يكمل المشوار
عزيزتي الحلوه,
والله رأسا ركضت للداشبورد , وضفت اللنك, خفت لتطفى الكهرباء, ههههههههههههههههههه
شكول , اسكت, اريد ادخل للحاسبه واحضن البوست, هههههههههههه
شكرا حبيبتي, اني العب بيتو بيوت, مدرسه مدرسه, سفر سفر, سوك سوك
ههههههههه
بس مرات افكر , ليش اللعبه عادة تتألف من اسم مكرر , والله عجيب!!
وج عيني , هسه اكلبه على قنوات, ما اريد اسمي , بس والله اضوج واتنرفز, ماكو كارتون بي خير ابد , بس شويه سبيستون, بس هم تعيد وتسقل, وخو اكو كارتون اسمه الجاسوسات, لا صوره ولا جرجوبه, والله يضوجني
وليش الاصوات وطريقة الدبلجه, يمه تموت تموت
شويه بس سبيس بور عدها شي مال اوادم , والله, وج عيني هم بس شويه
هههههههههههههه
همممممممم, اني والله وصيت بابا قبل ليسافر يشتريلي ديفيديات مال كارتونات, شسوي عيني , هم اضوج اني , والله
شكرا الج مره اخرى , وبوسه قويه , و الله يحفظج يا حبوبه
:) :) :)
البوست كلش حلو و الموضوع مهم لدرجة ان القليل جدا منتبهين على الفرق ما بين كارتون قبل و الكارتون الجديد. الافلام الجديدة و بالاخص افلام الكارتون على شكل حلقات يومية ما بيها اي معنى..صدكيني مرة شفت جهال حمابة يسولفون بينهم...همة صغار واحد يكول للثاني ايها الغبي سوف اقتلك..كتلهم من وين تعلمتوا هذا الكلام عيب ما يصير كالوا من الكارتون..يتفرجون هواية على نيكولوديون..بيها مرات افلام قصيرة مضحكة و حلوة بس باقي القنوات كلها بدون فائدة ولا هدف..حتى مرة وحدة من الافلام عرضت قصة حب بين مراهقين و همة طلاب مدرسة يعني الفكرة غلط غلط غلط.
دائما يجي على بالي افلام كارتون حكايات عالمية..تجنن كل مرة ينطونا قصة حلوة بيها الف معنى و معنى و كلها بريئة..تعلمنا منها هواية اشياء..ياريت لو يسوون افلام كارتون راقي مثل ايام قبل..بس للاسف ما اتصور بعد لان الكل هسة يسوي كارتون عن العنف و القتل و يستخدمون لغة حوار سيئة..
عاشت ايدج على الموضوع.
ساندي بيل: حبوبة بالصراوي يعني بيبي هههههه
الأخ الكريم البرجوازي العراقي..
عدنان ولينا من أحب الكارتونات إلى قلبي، بس آني افتهمت من كلامك أنه دتعترض كون الكارتونات هاية بيها حروب؟
بالحقيقة خلينا واقعيين أكو عالم بدون حروب؟؟
لا ..
إذن ما ممكن نعيّش الطفل بفد عالم خيالي وردي ما بيه قتل ولادمار ولا شي مو زين؟
بالعكس خلي يعرف أنه العالم بيه ما بيه، وشلون ممكن يستعد إله وشلون ممكن يواجهه. يعني آني اشوفه ذكاء من الدولة إنها تبني إنتماء وطني بالقلوب، تحسس الشعب أنه العدو هو من يريد بك الضرر، ويجب أن تتصدى له، مو هسه يجيبون ويصلقون بالسلام وما سلام .. تالي ماكو سلام أكو استسلام من ناحيتنا فقط.
يعني صحيح بالإسلام الله سبحانه وتعالى يقول: "إن جنحوا للسلم فاجنح لها وتوكل على الله"، وأنه كلمة الإسلام مشتقة من السلام، بس هم يقول الله: "فاعدوا لهم ما استطعتم من قوة ومن رباط الخيل".
آني كلش معجبة بالدولة اللي تنمي حب الوطن والهبوب للدفاع عنه في قلوب أبناءها على عكس الكثير من الدول اللي أبناءهم تنابل، يكوللولهم العدو راح يجي، راح ياخذون فلان مكان، راح يحتلوكم، يكولون: ها؟ شنو؟ يالله هم زين مو يمنا هنا!!!!!
بنفس الوكت: "فاني عندما اتكلم مع اطفال اجدهم لا يتكلمون الا عن القتل والسرقة كانها بطولات تاريخية مع الاسف والجيل الذي تخرب الان سيقوم بتخريب مستقبل العراق لحوالي السبعين سنة على الاقل اي الى ان ياتي الجيل الذي بعده ان كان مختلفا الله وحده يعلم ..."
هاية مصيبة .. صار القتل بطولة !!!!!!!!!! معناها هذا باجر من يصير شي بالدولة راح الأمان وأبو الأمان!!
وهذا غيض من فيض!
طبعاً ذكريات الطفولة وكارتونات الطفولة فدشي جداً جميل لأنها بريئة، أكو أشياء إلها وكت عود تنعرف بيها، مو بالضرورة يتفطن الطفل عليها بهالاسلوب البشع عن طريق أحب شيء إلى قلبه واللي هوه الكارتون.
أملنا إن شاء الله كبير وإن شاء الله يجي اليوم اللي يصير إلنة بيه إعلامنا النظيف اللي ينمي العقل ويرتقي به بدل ما يشغله بتوافه الأمور.
وأملنا بالأهل يديرون بالهم على اللي ديشوفوه أطفالهم (الأمانة اللي برقبتهم).
شكراً على المعلومات عن الألعاب بالعراق، وترة حتة لو برة بس هم جنا نلعبها من نلكي أحد يلعب ويانة، لأن بالغربة ماكو ناس.
أهلاً وسهلاً بأتاوي ..
أريد أظلل هاية الجملة لأن كلش مهمة ..
"الكارتون علمنه لغة و علمنا التمسك بالقيم الخصال الحميده في المجتمع. كنا نشوف حلقة عن الصدق و اخرى عن الامانه."
وهم: " بالاضافة الى كثير من البرامج التعليمية للغة العربية." <--- من أهمها على ما أذكر المناهل وافتح يا سمسم أبوابك.
"شنسمع بالكارتون لو من الخطار يدخل باللعب."
هذا أكبر دليل على أن عقل الطفل عبارة عن آلة تسجيل، وكلها تجي فديوم وتطلع. كلها مخزونة بالوعي وباللاوعي، وعقل الطفل ورقة بيضة ماكو شي عليها، فأول شي ينكتب عليها راح يبقة للأبد، شكد مهمة وشكد خطرة الشغلة!
"ان شاء الله نجد طريقة للارتقاء بأدب الطفل و الكارتونات الي ينشأون عليها حتى نطلع بجيل يحمل رسالتنا و يكمل المشوار" إن شاء الله بإذن الله وبوجود الأهل والأقارب الواعين إن شاء الله.
شكراً لردج المثري.
هههههههههههههه ساندي بل .. والله اضحكين .. حيوية كالعادة .. إن شاء الله يحفظلج حيويتج وسعادتج إن شاء الله..
يللة هسه نزلي كارتون على كيفج .. بس المشكلة هسه الكهرباء .. شلون؟؟
الله يساعدكم إن شاء الله ويفرجها يارب.
تحجين على سبيس تون من باب خبرة .. طبعاً آني ما أدري حتة شنو شفت، بس عود دا أكون على إطلاع .. كل شوية أدير وتلعب نفسي أدير وتلعب نفسي إلى أن طفيته!! وآني أشعر بالحزن الشديد والقهر على طفولتهم الضائعة !
إييييييييه .. الحمد لله آني ما أخلي أخوتي يشوفون هاية الخرابيط، كل ما يحلمون به من كارتون منزلته، كل الكارتون القديم ، والأفلام الجديدة والقديمة، أقوم بعمليه فلترة إلها واشوفهمياه قبل الناس حتة لا يشعرون بشي. (آخر فلم كان اسمه up يجننننن ).
مداخلتج - مالت وحدة خبرة بالسبيس تون - انطت مصداقية أكثر للبوست وطلعت آني مو متحاملة :) شكراً إلج ولردج الحلو ..
دمتي بخير :)
\أهلاً وسهلاً ميشو ..
نورتي مدونتي :)
صحيح مصيبة لغة الحوار السيئة، والكلمات البذيئة، والمصيبة الأكبر شغلات الكبار، هاية لعد شنو خلوا بالطفولة؟؟ ملخوهة! تخليلي تخيلي .. آني وكف شعر راسي ووكف قلبي وانقلبت روحي ليومين لمن سمعت الحجاية اللي هسه راح أكولج إياها.
بت عمي معلمة تاريخ، في مدرسة من المدارس الخاصة بالدولة، طالبة في الصف السادس الابتدائي، لكن شكلها مرية، كبيرة البنية، ويعني متفتحة، المهم أنه بت عمي لاحظت أنه البنية تلبس قميص شفاف وضيق وتحط حمرة وجلوس وكحلة وآي لاينر وشغلات (شوفي الفرق بين الأجيال!! احنة عود من نخلص مدرسة لو تخلين كحلة لو لا!!) إي .. وهاية البنية لازكة بسور مدرسة الولد الملاصقة! وجمالة طلع الباص مختلط، فلمة الإدارة مسكت البنية وديسألوها كالت: "بحبوا"
آني من يمي تخربطت، نعم يختي !! بالله شنهالجيل؟؟ سادس ابتدائي وفوكاهة الولد صف خامس ابتدائي!! والأنكى والأمر لمن كالوا للأماية! كالت شسويلها!!!!
هاية نتيجة أفلام الكارتون المتطورة! والتلفزيون المفتوح 24 ساعة بدون رقابة، والمسلسلات العربية، التي تناضل فيها البنية من أجل قضيتها القومية وتقاوم وتتسلح بالعزيمة والصمود من أجل أن "تحب" .. نعم بالضبط هاية صارت الثقافة هسه، لدرجة اختلط الحابل بالنابل و محد - أكيد - يعرف قدسية هاية المشاعر وصارت خان جغان لازم الكل يحب واللي ميحب هذا ميت لا محالة!
المشكلة الواحد من يندار ويشوف الوضع اللي حوله، وحال أمتنا، وحاجتنا لأمة واعية تعرف أعداءها وشنو ديخططون، وتتجهز وتخطط وتقاوم وتناضل وترفع من شأن نفسها، مو أمة تتبع كل تافه في باقي الأمم، وتغمض عينها عن اللي ديصير حولها وإلها.
الله ييسر ويسهل .. احنة أملنا بالأهل هسه لأن الإعلام والسيطرة عليه ينرادلها رجال أول، وحتة يصير عدنة رجال لازم يكون عدنة أطفال مو مخلقوت مشوهة، فأملنا بالأهل وتربية الأهل والله كريم.
إرسال تعليق