انعدام الرؤية الأفقية

في طريق عودتي من العمل ، وجدت أن الجو مغبر جداً ، ما أدري الشوارع اللي مشيت بيها يم الصناعية ، لذلك كان هذا هوه الوضع ؟

المهم أن الجو استمر غائم ، والرياح قوية ، تثير الغبار، مما يذكرني بالآية " وأرسلنا الرياح لواقح" وبالتالي المتوقع أنه غداً راح تمطر إن شاء الله.

طبعاً آني مدا أسوي نشرة الطقس ! لكن اللي ردت أحجيلكم إياه أنه سمعت اليوم بالأخبار يكولون للناس لا يطلعون للبحر لان الموج ارتفاعه مدري شكم عقدة ، وأن الرياح تسببت بانعدام الرؤية الأفقية ..

تخيلت شلون الأفق أبيض هسه ، وإذا بصوت الهوة يصفك بوب البيت ، مما أدى إلى حالة استفار عام لإغلاق الشبابيك ومن ثم مسح الأخشاب لأنها لازم تلمع مثل بيت مرت أبو سندريلا .. المهم بلحظتها فكرت .. هيه بس الرؤية الأفقية اللي انعدمت ؟؟؟

والله الحقيقة أنه الرؤية كلها مغبشة وماكو شي مبين ، لا رأسية ولا أفقية ولا عمودية ولا مويربة ولا غيرو!

الحقيقة أنه الرؤية هيه رؤية البصيرة اللي الله رزقها لناس معدودين ، مو الكل يعني !

أبسط شي مواقفنا السياسية وحتى الاجتماعية والدينية ، احنا بالفعل معدومي الرؤية !

شوفوا شلون نكون ضايعين لمن تكون الرؤية الأفقية معدومة ، إذا ما نعرف الطريق ، يضيع المخرج أو الجسر ، ميصير الناس تطلع بالبحر لأن راح تروح ما ترجع ..

عاد الرؤية الكلية اللي ضايعة منة ؟؟؟ شلون ؟

معناها أنه احنا راح نكون تائهين ..

وهذا يذكرني بقصة على ما أذكر كتبها الكاتب منذر أبو حلتم ، عن عميان يمشون في الصحراء ، الأول يعتقد أنه اللي وراه ديدليه على الطريق، الثاني عباله أنه الأول يقوده ، الثالث ، يكول أكو اثنين كدامي ما ممكن أضيع !!

لازم نبدأ جهدنا ، إذا احنا الله أنعم علينه بنعمة البصيرة الصحيحة وخلانة بظروف مناسبة بحيث افتهمنا صح ، لازم نساعد الناس تشوف الصح، ونتغلب على انعدام الرؤية ، وأهم شي حتى لا نصير مجرد قافلة عميان يتبعون أسوأ الأشياء فقط دون تفكير !

مجرد كلام خطر في بالي وردت أحجيه .. ومثل ما يكولون .. مجرد كلام .. حجيته ومشيت :)