وجاءت الامتحانات

يوم الأحد بالحقيقة بدأت .. مو امتحاناتي لأني الحمد لله خلصت .. إنما امتحانات أخوتي ..
بس خلوني أسألكم أسئلة وبعدين راح تعرفون شلها علاقة بالامتحانات:
شاحنة وكفت بالدوار فجأة ليش؟؟
لا تقرون الإجابة إلا بعد محاولات عديدة، بس آني هم متأكدة إنكم ما راح تعرفون ..
بالحقيقة عبدالرحمن سألني هذا السؤال المحير، وآني من كل عقلي كعدت أحاول أحزر!
إلى أن جاءت الإجابة: لأن أكو نملة مدت رجلها بالدوار !!!!
- لا الله عليك !!
- زين زين زين زين .. قطارين مروا بنفس النفق بنفس الوقت الساعة خمسة تماماً بنفس الدقيقة بنفس الثانية، ومروا باتجاهين متعاكسة، ولا واحد بيهم انشخط، شلوووووووووون؟؟ (علامات الشر على وجهه)
- أنا: مممممممممم واحد مر خمسة الصبح واللاخ خمسة العصر !
- لاااااااااااااااااااااااااااااااااااااااااا شلون عرفتي ؟؟؟ إنتي ذكية لعد
- زين زين ..
- ولك كافي .. خلي ندرس ..
- لا لا لا بس لحظة، درهم يمشي بالشارع لابس ربطة ليييييييييييييييييييش؟؟
- هسه الدرهم ولد لو بنية؟؟
- تؤ لتحجين هيجي .. هسه جاوبي !!!
- لأن طالع من البنك الإسلامي
- يبووووووووووووو شلون عرفتي ؟؟
- أكولك كافي عاد ترة هسه تنكتل .. ادرس يللة ..
- زين بس سؤال واحد .. الله يخليج بس سؤال
- لا
- بس هالسؤال
- لا
- الله يخليج
- لااااااااااااااااا
طاااااااااااااااج ضربة العصا على الكاع (بوقع تهديدي)..
يعنفص عبد الرحمن ويكعد يقرأ .. ويدردم ويكول (ماما رحيمة إنتي شريرة)
طبعاً هذا مشهد يخص دراسة الامتحانات .. ولا تسألوني شلون !!
ماكو هيجي .. كل الظُرف وخفة الدم والحزازير والفوازير والنكات تطلع بالامتحانات ..
******************
لعد راح أطلعكم على معلومات ما ممكن تكونون تعرفوها، والحقيقة آني اللي مخلصة جامعة هم ما جنت أعرفها، إلى أن عرفتها بالامتحانات الفصلية الأخيرة:
طبيب الأسنان = teeth doctor
الطائرة = plane
الطيار = planer على وزن Paint --> painter
شفتوا بالله !!
******************
الصدك يعني اشتاقيت للامتحانات .. الخوف والرعبة، والدراسة والركض، وكوني أبد ما دخلت بحياتي امتحان مخلصة دراسة، والجابتر (الفصل) اللي ما أدرسه يجي بالامتحان، والتأليف والإبداع ، وأحله شي بالجامعة لمن يكون الامتحان طويل (صارت مرتين) وآني اعرف الحل بس ماكو وكت وأكتب الملاحظة I know the answers but there is no time
وصدك أجيب أجيب A+ والحمد لله والشكر!
والدراسة على الترفكلايت .. والدراسة فوق يم باب السطح بالمدرسة وبالجامعة ..
والله أيام ..
هيجي بس شوية ردت أسولفلكم على الامتحانات وأكوللكم إني راح أتأخر - على أساس متأخرت !! - المهم يعني إلى أن تخلص الامتحانات ..
ودعواتنا للجميع بالتوفيق ..
وخطية أهل الثانوية العامة .. الله يوفقكم وييسر عليكم ولا تنسون تبيضون وجهنه! نحن نعتمد عليكم ^_^
وهذا فيديو قصير عن طالب ذكي، بس ديروا بالكم تسوون مثله!!