على الرغم من إني نعسانة جداً جداً جداً .. وتعبانة ومنهكة وراح أموووووووت من التعب ..بس أحب أن أؤرخ هذا اليوم على مدونتي قبل ما ننتقل لليوم اللي وراه ..
هسه أحجيلكم ليش ......
لمن ردت أرجع بسرعة ورة الدوام للبيت لأن أريد أسوي كيكة، سألوني البنات .. ليش ؟؟؟
كلتلهم متدرون ؟؟؟ اليوم ميلاد أناستازيا نيكولاس رومانوف ..
هذولي مكمكوا عيونهم .. وكالوا: شنو عيني ؟؟!!!!
كلتلهم شبيكم متعرفوها ؟؟؟
كالوا لااااااع .. ششايفتنه ؟؟؟ احنة حدنا سعدية وأم عباس!
ميخالف .. شوفوا .. هاية بنت القيصر الروسي اللي سووا عليه ثورة البلاشفة ..
شنووووووووووو ؟؟؟ ثورة الشراشفة ؟؟
لا يولوووووووووووا .. اسمعوا .. وطبعاً شرحتلهم عن القيصر اللي عنده أربع بنات وولد، وثورة البلاشفة الشيوعية، والإطاحة بالقيصر وإعدامه مع عائلته والأساطير التي تحكى عن البنية الرابعة (أناستازيا) التي يقال أنها أصيبت لكنها لم تمت مع العائلة وأن عائلة أنقذتها وربتها، إلى آخره من الأفلام والقصص والكارتونات التي اعتمدت على هذه الأسطورة .. وبالأخير كلتلهم .. اليوم مواليدها البنية ..
هااااااااا .. هممممممممممممم .. زين أدري شلج بيهة؟؟؟ وشنو تحتفلولها بيوم ميلادها ؟؟ مو ماتت ؟؟ شنو كرايبج؟؟
لا عاااااااااااااد .. ترة آني راوييوف مو رومانوف !!!
ها؟ لعد شنو ؟؟
شوفوا .. هذا آني جان عبالي أنه آني حفيدة الأميرة المفقودة، وجنت متابعة حياتها، وعندي مقالة محتفظة بيها من مجلة ماجد .. تكول أنه يوم ميلادها 18 يونيو 1901م .. (أشو هسه من دا أدور على النت يطلع غير شي) المهم أنه صدفة ماما جابت أخوية بنفس اليوم ..
وهكذا فاليوم هوه يوم ميلاد برهومي .. حياتي ألومي اللاوي ..
ولأنه دنريد نشجعه يحفظ ويدرس .. ولأن نريد حجة دنسوي كيكة أم كريمة ونحتفل .. فقد قررنا أنه يتم عمل حفلة منزلية :)
كل عام وإنت بخيييييييييييييييييييير ولله أقرب وعن الخباثة أبعد .. حياتي برهومي ..
أحله شي الأولاد - تحت إشراف والدتي - سوولنا مفاجأة .. وأنشدوا "سنخوض معاركنا معهم"، وبرهومي سمّع سورة الضحى مع الكثير من المساعدات .. لأنه للأسف ميقبل يحفظ .. طبعاً هاية نتيجة أنه يكون آخر العنقود!
وطبعاً آني دا أكتب هاية التدوينة حتة من يكبر برهومي أسبيه بيها D:
بالمناسبة برهومي كبر كللللش هواية وصار عمره خمس سنوات :) صار رجال وماكو هيجي عقل :))
زين.. راح أشوفكم شغلتين ..
أولاً زوار مدونتي يعرفون برهومي .. لكن محد شايف هاية الصور النادرة .. مو بس لأنه برهومي .. بس لأن كليتنة جنة هيج لكن التكنولوجيا جانت شوية تعبانة فمحد صورنا :(
سبحان الله .. يعني الواحد يصفن شلون دقة الخلق!
أما الشي الثاني هوه الكيكة دبل فاليوم اللي سويتها :) بعدين أكللكم الخلطة .. رجاء لحد يضحك .. صايرة بيها إنزلاقات.. يلا هيه هم فيكة :)
6 التعليقات:
ولو ألومي يا دوب يتذكرني و اكيد استغرب ليش هاي "الخاله" هيجي حبته من اول بوعه و كلش اُعجبت بي.. بس كل عام و هو بخير و ان شاء الله ربي يجعله من حفظة القرآن .. و مثلما كلتي ان شاء الله بعيد عن الخباثه
اكيد مو كرايب ولا ابد؟ ولا من بقية العيله؟ لعد شلون تعرفين قصتهم!
المشكله انه اكو ناس معلوماتها مو تقتصر على سعديه و ام عباس لان ماكو غيرهم بس لان هم ما يتعبون نفسهم يشوفون شكو ماكو غير سعديه و ام عباس
يعني انطيتيهم درس تاريخ بدل ما تنطيهم وصفة الكيكه.. ان شاء الله دائما :)
عندنا مثل هاي الصورتين الاخيره مجرجبه بالبيت بس سر ميصير نكول منو.. ان شاء الله عن قريب تفرج و اشاركم اسراري :)
شكراً على التدوينه ولو اخرناج عن نومتج .. تسلميلنا
زهرة ياام كلب الطيب
عيد ميلاد سعيد برهومي ياعراقي يااصيل
بعدين الاصح ناسستاسيا مو أناستازيا
مو اني عشت بروسيا مدا احجي من جيب فارغ
وكذلك نقول
دعاء مبارك ولانقول اشخبطات
ربي قد وكلت إليك أمري كله ، وأسلمت بين يديك أمري كله ، فكيف أهان وعليك متكلي، وكيف أخيب وأنت أملي ، بيدك الخير إنك على كل شيء قدير، يا مالك الملك ، يا عالم الغيب والشهادة ، يا رحمن يا رحيم ، اللهم اكتب لي الخير حيث كان ورضني به
وهسة وصلنا للكيكة عاشت ايدج وعوافي لكل من اكلهااو نظر اليها بحسرة
تقبلي احترامي الكبير
أحب هذي القصة لأن اتصور نفسي بقصة تشبه قصتها ~~~ :D:D:
وكل عام وبرهومي وانتم بألف خير يا رب!
منين يجيب الخباثة اذا ما مصلاوي؟!!
:D:D:D:D
هههههههههه
تحياتي واصدق امنياتي
ههههههههههه تسلمين أتاوي .. آمييييييين الله يسمع منج .. وعقبال أولادج إن شاء الله.
عاد اليوم كعدنا دة اناقش، ومخلينا شي عن راسبوتين والقيصر والعائلة والقصور ويبووووووو اغتابيناهم خطية الجماعة :)
إن شاء الله "تنفك الجبسة" (;
شكراً عزيزتي أتاوي على الرد السريع والجميل..
-------------
الأخ الفاضل خالد
الغريب إني سمعتها بالإنجليزي أناستيشيا! بس شكراً على المعلومة.
أما الدعاء فهو والحمد لله دعاء مبارك، بس (شخبطات) قصدت بيها كومة الحجي والأشياء اللي ما إلها علاقة ببعضها مثل مقولات من أفلام أو أشياء أحب أكتبها.
شكراً لتهنئتك ولردك :)
------------
فايوليتا..
وإنت بخير عيني .
ما مصلاوي بس همه الراويين كاصرين؟؟ ههههههههه أشكرج على المرور عزيزتي :)
أخوية الصغير إبراهيم
كل عام وانت بخير وان شاء الله نشوفك شي جيبر تشرف دينك وأهلك أمين يا رب العالمين
ودا انتظرك تكبر حتى تجي تشتغل وياية بمؤسسة متهجولون بإذن الله
يللة غمض فتح وانك تشوف نفسك دتفوت للجامعة
الله يبارك بيك ويحفظك لأهلك
تحياتي إلك وإلى الجميع
أخوكم أبو الحسن
آميييييييييين الله يسمع منك أبو الحسن ويصير إبراهيم جندي من جنود الإسلام..
جزاك الله خيراً على الدعاء وعلى التهنئة :)
إرسال تعليق