كـــــــــــــــــــــــــل عــــــــــــــــــــــــــام وإنتـــــــــــو بخيييييييييييييير
أدري كلش تأخرت بالمعايدة، بس والله مخبوصين، إن شاء الله خبصة خير.. جنت ناوية أخلي بوست عن عشر ذي الحجة، عن يوم عرفة، بس ما لحكت.. حتة ما عيدت على أحد أول يوم العيد لأن نسيت موبايلي، وكل السكجول مالتي تخربط!
على العموم هذه صورة حية من شوارع الإمارات في يوم وقفة عرفة، حيث كلما نوكف على ترفكلايت نشوف بيك اب شايل أشكال أرناك من ذولة المكاريد, فقررت أنه ألتقط لهم صورة أحطها على البلوك بمناسبة العيد، وتلاحظون أخونة في الله ديباوع علينة وبقة ثابت إلى أن طكيت الصورة وابتسم عبالة دنسوي دعاية سجنال تو! خطية!
صحيح أنه ما ذبحنا هالعيد هنانة لكني تخيلت خروفنة وهوه دينذبح بالعراق، وكم يتيم وكم أرملة وكم محتاج راح ياكلون من عنده، رغم أنه الخرفان كلللللللللللش غالية السنة بالعراق، يعني حوالي800 - 900 درهم أما في الصومال فيكلف الخروف 200 درهم!
حاولت أفتهم السبب في بلد المزارع والخيرات - سابقاً - بس هم بعده أرحم من الصومال، لكن والله ما افتهمت!
لكن أهم شي أنه السعادة اللي شعرت بيها جانت كلش مو طبيعية.. سبحان رب العالمين
أتمنى إنه عيدكم جان آمن وسعيد وإن شاء الله العيد الجاي كليتنة على جبل عرفة.. مغفور ذنوبنا.. متقبل طاعاتنا.. آميييييييييييييييين
4 التعليقات:
وانت بخير ان شاء الله وعلى جبل عرفات تكون التكبيرات
السعادة لحظات من عمر الزمن يقتنصها الإنسان،تلك اللحظات هي أن أهنئكم بعيد سعيد ومبارك أنشاء الله على كل المدونيين والعراقيين في أرض المعمورة ،وكل عام وأنتم بألف خير.
كل عام و انت بخير :) آمين لدعواتج.. يبدو سنة الجاية رح نشوف هوايه ناس ان شاء الله
على سيرة المكاريد و الابتسامة العريضة من اخونا في الله.. كنا صغار نلعب ويه الخروف بالحديقة و كم يوم ميع و ميع وره غرفتي و ننصدم بعدين لمن تجي ساعاته الاخيرة.. اني و خواتي ننقهر عليه و لا كنا نكدر ناكله المكرود.
سلام للجميع
وأنتم بخير وصحة وسلامة وأمان جميعاً..
وأعذروني على التأخير..
وفقنا الله وإياكم لما يحب ويرضى
إرسال تعليق