في عملي نقوم بالدعم الفني للأشخاص على الهاتف، اتصل واحد بريطاني، يريد يربط اللاب توب على الوايرلس، ناسي الباسوورد، عادة ننطيهم رقم شركة جهاز الإنترنت، لكنه كال أنه صارله ساعتين يخابر عليهم ومحد يجاوب، على كولته : أنه جان على الهولد على الستيوبد ميوزك .المهم ردت أساعده النوب طلع ناسي باسوورد الجهاز، يبوووووووووووووو معناها لازم أخليه يسوي ريست ووووووو المهم ما أدخل بالتفاصيل التقنية، اللي صار أنه كعدت أقوده عبر الخطوات، وبعدين الجهاز لازم يرجع يشعل وياخذ وكت، فكال: "سو، وير أر يو فروم؟"
حاولت ما أنطيه مجال بس أشو هذا رجع سأل فجاوبته: "من العراق"
هذا انفعل..
"والله؟؟ آني وزوجتي جنة بالعراق، طبعاً أيام ما كانت العراق جنة، كنا ندرّس بالجامعة التكنولوجية، كانت جنة حقيقية قبل ما يخربوها ويسووها جحيم! العراقيين فد نااااااااااااااس لطفااااااااااااااااء وجداً جداً جداً جداً أذكياااء، والبلد يقدر قدرات أبناءه."
طبعاً آني شكرته بالنيابة عنكم وعن الشعب العراقي على هالكلمات الحلوة، وكبر راسي كلللللش.. بالله شفتوا الناس شنو نظرتهم علينة ..
ورة شوية كال: "أنه الي ديحكمون العراق عبارة عن وحوش وهمه خربوا العراق كله ودمروا أهم شي بالعراق وهمه أبناءه .."
بعدين أخير شي ورة ما كلشي اشتغل يمه، كال: "أكو فد نقطة جذبت نظري بشكل جداً غريب وهو أنه إنتو العراقيين ناس جداً جداً جداً جداً ......" (مع التشديد على كلمة فيري) .. آني دا أنتظر القنبلة .. إي .. جان يكول: "وطنيين .. شلون صرتوا هيجي ؟؟ شلون انبنة شعور الوطنية بقلوبكم ؟؟ شلون تحبون العراق لهالدرجة؟؟" (مادلي madly على كولته).
آني حاولت أجاوبه باللي أعرفه، لكن كولولي إنتو شلون كان ممكن أجاوبه؟؟ بالحقيقة كولولي إنتو شلون هيجي احنة نعشق العراق؟
