شوية تبخ ..

كيكة بالتمر


كيكة بالموز


قطع من كيكة الموز


الكيكة العادية هيجي اسمها بحسب خالاتي وأمي :) وبالمناسبة ينتهي إعدادها خلال 10 - 15 دقيقة:
المقادير: (شوفوا شكد سهل تحفظوها - عد تنازلي)
4 بيض
3 طحين
2 سكر
1 زيت

حليب
بيكنج باودر (ملعقة لكل كوب طحين)
فانيلا

طريقة العمل:
قبل الخبز: نشعل الفرن حتة يسخن، ندهن القالب ونرشه بالطحين (طبقة كلش رقيقة).
نخلط البيض وية الفانيلا، نضيف الباقي تدريجياً، أفضل الترتيب التالي (سكر ، طحين ، حليب ، زيت) أخير شي البيكنج باودر.

النكهات حسب الرغبة:
شوكولاتة، موز، جوز هند، برش من قشر البرتقال، جوز، تمر(يكون مذاب في ماء ساخن، ويوضع ربع كلاص طحين ليعادل ماء التمر ويفضل تقليل السكر).
ممكن إبقاءها على الفانيلا، وسكب نصف المحتوى، ثم إضافة شوكولاته على الباقي وتصير الكيكة نص نص.

الخبز:

ممنوع فتح الفرن أول نصف ساعة.
20 دقيقة على العالي.
35 دقيقة على حرارة متوسطة

عود فوتوا السكينة بالكيكة إذا طلعت نظيفة يعني استوت الكيكة وبالعافية :)

7 التعليقات:

Violet يقول...

عاشت ايدج !
D:

attawie يقول...

بس فد اضافة مهمة "الكيكة العادية" معروفه عالمياً .. اقصد بالعراق.. بكيكة واحد اثنين تلاثة :)

والله طباخة ماهرة انت
مبين من توجيهاتج.. اهمها

"ممنوع فتح الفرن أول نصف ساعة"

كلش حبيت الممنوع لان دائما احد اكو فد ناس يفتحون الفرن قبل هالفتره و لا تخليني اجيب اسماء ;)

كيكة الموز ما شاء الله شلون نافشه!

أبو الحسن يقول...

هسة متكلولي ليش ما تحطون كريمة فوك الكيكة؟؟؟ هي مو كريمة يسموهة اتصور نستلة او فد شي خليط من كاكاو ووو اييي شمعرفني هسة المهم هي الشي اللي ينحط فوك الكيك

هي النقطة ليس انه اني احب الكريمة فوك الكيكة

لكن اني احب لما يسووهة اروح اكل منهة من هاي اليدة اللي يخبطوهة بيهة واللي ما اعرف شيسموهة وبعدين أحد النسوان تلكفني وتكوم تدردم وبعدين تروح تغسلهة وترجع تشتغل خطية والله الله يعينهم علينة

ولو صارلي يمكن ما يقارب ال6 سنوات ما سويت هل حركة أولا لانه ما اعرف شلون مشت السنوات وكمت استحي اسوي هل امور
وثانيا لعدم التواجد بالمنزل

سبحان الله وين راحت ذيج الايام

الله يعوض ان شاء الله

عاشت ايدكم والله يديم هل مواهب

زهرة الراوي يقول...

Violet of Mosul ..
وإيدج العايشة .. تسلمين :)

أتاوي ..
مو بالله!! يعني تخرب والله لأن يعاندون ويفتحون الفرن!
أتذكر أكو مقادير مختلفة لأيام الحصار، من ألكي الدفتر مالتي أخليها.. متقشفة وبيهة بس بيضة وحدة :)

أبو الحسن ..
الله يسلم إيدك، وكيكة الكريمة (بيها كريمة ونستلة) قريب أحطها على المدونة إن شاء الله.

أشراقة الأمل يقول...

أنت شيف راائع زهورة بارك الله فيك

Sumayah يقول...

عاشت ايدك قلبي بس شكد نضيف موز وشكد نضيف تمر؟

زهرة الراوي يقول...

مرافئ ..
حيييييل من 2010 .. أعتذر عن التأخر بالرد .. أشكرك خجلتوني :)

مطبخ محبة الخير ..
موز تقريباً موزتين كبار .. والتمر فد كوبين من التمر المعجون بالماي (مو هواية ماي بس
حتى يلين) ..
أشكر مرورك الكريم ..

 

© Copyright يـوميـات مغتـربة . All Rights Reserved.

Designed by TemplateWorld and sponsored by SmashingMagazine

Blogger Template created by Deluxe Templates